Read lubukusu Ayu. 4 Bible Online

Ayu. 4 - lubukusu bible

Ayu. 4

¹Nio Elifasi Omutemani aakobosia ali:

²Omundu ne akhaka khulomaloma ne nawe, onyala wakhalala? Kakhaba kario, se nyala nasila tawe.

³Lola, ewe wekisia babaandu bakali, lundi watinyilisia batekhele.

⁴Ewe waoleelesia abo ba baaba ne bakwa, lundi wara kamaani mwaabo bakhanyala khukhwima tawe.

⁵Ne kakhali luno nawe bwakhwolilekho ne se oli ne liliekhaliilikha tawe, butinyu bwakhukwiilekho, mala wabeele ne liaayaaya.

⁶Buriaani bwowo khu Wele se buli lilieyikina liowo? Ne chingila chowo che buluungi se chili lilieyikina liowo?

⁷Luno yibaasia, naanu owabuna ne akhalikho ne butinyu tawe? Namwe baluungi, khumwaatwa ku?

⁸Nga manyile, babaandu babiaala bumayaanu, lundi bamiicha butinyu bakesa bubwene.

⁹Babunisibwa ne kumuuya kwa Wele, beerwa ne lirima likali lia Wele.

¹⁰Khukhookha khwe etalang'i, khuulukhuma khwe etalang'i endafu khuwao, kameeno ke chitalang'i ching'ana kakhoongolwa,

¹¹ne etalang'i eyo efwa khulwe enjala, mala ching'ana chayo chisalaanila.

¹²Elomo yanjichakho mu bwikisi, liiru liase liaulila khumoonya khwayo.

¹³ Biaba biise bia akari we kamalola ke siilo, biise nibio babaandu bali mwiilo likali,

¹⁴buuri ne literema bianjichakho, bibiasisiikha kamakuumba kase koosi.

¹⁵Roho aabira ebweeni wase, mala kamaswa kaase kenyokha.

¹⁶Roho eema, ne kakhali se namanya efwaani yewe tawe, efwaani yaba ebweeni wase, buli siindu siasila, nio naulila kumumilo.

¹⁷“Omundu owabuumbwa Omuluungi ebweeni wa Wele anyala aabaao ku? Omundu anyala aaba omukwalaafu ebweeni wo Mubuumbi wewe ku?

¹⁸Wele se eyikina bakholi bewe tawe, aakhaba bamalaika bewe bali ne kamabi.

¹⁹Nono se anyala eeyikina omundu ooli sibuumbe sie liloba tawe, owabuumbwa khukhwama mwipukhuulu lundi onyala aatubundulwa nga sipurupuru!

²⁰Babaandu bakali babunisibwa akari we kumutikhinyi ne ekolooba, bafwa mala bebililwa khulwa mindali ne se aliio obakhebulila tawe.

²¹Bioosi nibio bali nabio bibukulibwa, bafwa ne bakhali ne limanya tawe.”