Read lubukusu Ayu. 40 Bible Online

Ayu. 40 - lubukusu bible

Ayu. 40

¹Omwami Wele aachiililila khuboolela Ayubu ali,

²“Eku, ewe oomenieelesia obone kamabi, onyala wayingana ne Wele Omunyali Owa Bioosi? Yesi yesi ookhandarania Wele, akhoya akobosie kamareebo.”

³Nio Ayubu aakobosia Omwami Wele ali,

⁴“Lola, ese ndi busa sisiindu sitiiti, khukobosia ndi siina? Se ndalomakho sisiindu siosi siosi tawe.

⁵Niko naloma kanyala, se niilamo lundi tawe, naloma ne niililamo, ne kakhali se ndachiililila khuloma tawe.”

⁶Nio Omwami Wele aakobosia Ayubu khukhwama mu siifuusia ali,

⁷“Yiboa munda siseecha siene, ndakhureeba ewe, ne ewe olakobosia kamareebo kaase.

⁸Eku, olikho okhaka khukhwekesia oli ese nakhalaake bukhali bwa ng'ali tawe? Ewe umbiiya nio obonekhe khuuba owa ng'ali?

⁹Ewe oli ne kamaani nga Wele? Onyala wakhookha ne kumumilo nga kukwase?

¹⁰“Yeyekesia khuuba ooli ne lukoosi ne bukali, yekesia oli oli owe luyali ne bulayi bukali.

¹¹Aambila babaandu lirima liowo likali lola yesi yesi owe kibonio, mala omuupe asi.

¹²Lola buli mundu owe sileka mala omwikhisie khangu, swalakilila bamayaanu abuundu niio bali.

¹³Basiikhe boosi alala mwiloba, obaboe boosi asi mu sibala sie makoombe.

¹⁴Nio ese sesi ndafukiilila ndi, kamaani kowo wamwene kakhueleesie bukhili.

¹⁵“Lola kufubu Behemoti nikwo nabuumba, nikwo nabuumba bulayi nga ne nabuumba ewe, kwaaya bunyaasi nga ekhaafu.

¹⁶Kamaani kaakwo kali munda mwakwo, ne bunyali bwakwo buli mu nyama che munda mwakwo.

¹⁷Kwimia kumukhiinga kwakwo tatatata nga kumunyaali, ne kimikotio kie binama biakwo kiaambaana alala ngilingili.

¹⁸Kamakuumba kakwo kamalume nga kumukasa, ne bikele biakwo bili nga bisiindi bie sichuuma.

¹⁹“Nikwo kunyoa mu milimo kie khuukia kia Wele! Owakubuumba yeng'ene niye onyala aakuula.

²⁰Bikulu niio chisaang'i che mundaa choosi chinyaila, biaana siakhulia siakwo.

²¹Kukona asi we kimisiru kie kamawa, ne khukhwekisa mu bisere bie mu lureende.

²²Kwekisa mu siiniini sie kimirongooro kie kamawa, kuli akari we bisaala bie khu luuchi.

²³Luluuchi lwakhechula, se kuria tawe, kwelanguliila busa aakhaba luluuchi Yoritani ne lukhulukukha lukali mu moni mwakwo.

²⁴Eku, naanu oonyala aakutiimbia chimoni mala aakuaamba? Naanu oonyala aakuruundura lilioolu liakwo ne kumureko?

²⁵Eku, onyala waloba kukweena Lefiatani ne kumulobo, namwe waboa lulimi lwakwo ne kumukoye?

²⁶“Eku, onyala wara lusaala mu lioolu liakwo, namwe wafutula lunyaanyilo lwakwo ne kumulobo?

²⁷Eku, ewe wibaasia oli kulakhwikoonjelela okulekhe? Eku, kulalomaloma khwiwe kalaa?

²⁸Eku, kulakhola endakaano nawe, okubukule kube nasioobi kwowo buli lwoosi?

²⁹Eku, olakubaya kube nga enyuni, mala okukhole kube sisiindu sie khusangaasia bakhaana bowo bakhukholelanga ewe?

³⁰Eku, ewe wibaasia oli banaabi be ching'eeni balakhweesanila khu bukusi bwakwo? Eku, baboofuli baleenya khukutonyamo ne khukabana?

³¹Eku, onyala waunaka lisieelo liakwo ne kamafumo, namwe kuurwe kwakwo ne lifumo lie khuunila ching'eeni?

³²Ewe khakakho busa khukutiilakho, olabona kaalekholekha khwiwe; se okheloondekho lundi khukhola orio tawe!”