Read lubukusu Ayu. 41 Bible Online

Ayu. 41 - lubukusu bible

Ayu. 41

¹ “Omundu yesi yesi oobonakho Lefiatani, awa kamaani ne khuukwa asi.

²Mbao omundu ooli omurafu oonyala aakuriikhirisia tawe. Naanu nono oonyala eema ebweeni wase?

³Naanu owambelesiakho siindu, nio nenyekhe khumukobosiela? Buli siindu siili asi we likulu sili sisiase.

⁴“Lekha mbaboolele khu bikele bie kukweena Lefiatani, mala ninoosie nga ne kuli kuboofu lundi kwe kamaani.

⁵Naanu oonyala aabaaka lisielo liakwo? Naanu oonyala aafutula engubo eye siibia, eyakufuunikha sifuba?

⁶Naanu oonyala aakwaasamia? Kimiino kiakwo buli lubeka kili kie khuriisia!

⁷Kumukoongo kwakwo kuli nga chingabo chingali chiaambaanisiibwe, chichatiilana nga kumuuri kwe libaale.

⁸Buli libaabi lieamba khu liindi tati, aakhaba embeo se nyala yabira akari tawe.

⁹Koosi kaambaana alala ngilingili, mbao sinyala siakaukhasia tawe.

¹⁰Ne kwasimula buwaanga bukali bukhosia, ne chimoni chakwo chili chimbesemu nga enyanga ne esoa.

¹¹Mukhanwa mwakwo mwamamo chimuli chiburukha, ne chinjaso che kumulilo nacho chifututusia.

¹²Mu moolu kakwo mwamamo liliisi, nga liliaama mu ndekhelo etotokhela, nga chiikhu chicherika kumulilo.

¹³Kumuuya kwakwo kubwaana kamanda, ne chinjaso chama mukhanwa mwakwo.

¹⁴Kamaani kamakali kali mwikosi mwakwo, babaandu ne bakubona bawa kamaani sikila buuri.

¹⁵Chinyama chakwo chaboraana alala, chaandanakho tatatata nga sibia.

¹⁶Kumwoyo kwakwo kuli kumuandalafu nga libaale, kumuandalafu nga lususi.

¹⁷Ne kwinyokha, banaitiriani baria, bafwa kimiooyo sikila buuri, bawa sio sikila buuri.

¹⁸Embalu se nyala yakukholakho sisiindu tawe, libeele lifumo, buembo, namwe kumusakhu.

¹⁹Kubona sichuuma nga lukhaanja, ne kumukasa nga kumusaala kukwabola.

²⁰Buembo se bukukhola kwelukha tawe, kamabaale ke mburuusi kakwakalisia nga lunyaasi.

²¹Chiruungu chili nga lukhaanja, kuchekha busa babaandu ne bakuchukucha kamafumo.

²²Munda mwakwo muli nga bikoloonjo bibiooki, ne kwekhuruurira mu matosi, kukhola kimikhuruuro, nga embako ne lima.

²³Kutumbuula enyanja, nga kameechi kaasela mu nyuungu, nga enyuungu eye kamalesi ne kasiuukha.

²⁴Ne kuchiila mu meechi, kulekha enyuma engila eye lifuro liwaanga ne ling'enang'ena.

²⁵Khu sibala mbao nisio okukelaaniakho tawe, kuli kusaang'i kukhali ne buuri tawe.

²⁶Kulekeelesia boosi baali ne kibonio, kuli omwami owe chisaang'i choosi chindafu.”