Read lubukusu Ayu. 42 Bible Online

Ayu. 42 - lubukusu bible

Ayu. 42

¹Nio Ayubu aakobosia Wele Omunyali Owa Bioosi ali,

²“Ese manyile ndi ewe onyala wakhola bibiindu bioosi, liosi liosi nilio wenya khukhola, se linyala liakhiingililwa tawe.

³ Naanu yuno naye ookisa likaambila likhali lie limanya tawe? Khwako, nalomaloome niko khamanyile tawe, bibiindu bie khuukia lukali khwise, nibio khamanyile tawe.

⁴ Ulila, ne ese ndalomaloma, nja khu khureeba ewe, ne ewe olangobosia.

⁵Abeele naulilakho busa khuloondekhana nawe, ne kakhali luno samwene nakhuboone ewe ne chimoni chase.

⁶Khwako ne leka samwene, ne khukhwibiiya, nikanila mu khwiiakha lipukhuulu ne likokhe. Nebona ndi se ndi siindu ebweeni wowo tawe.”

⁷Enyuma wa Wele Omunyali Owa Bioosi khumala khulomaloma kamakhuwa kano khu Ayubu, Wele Omunyali Owa Bioosi aaboolela Elifasi Omutemani ali, “Nakhukhalaliile ewe ne basaale bowo babili, sikila se walomile ka ng'ali khuloondekhana nase nga omukholi wase Ayubu ne akholile tawe.

⁸Khwako luno, bukula chiuunwa saba ne kamamiiku saba, mala muche khu mukholi wase Ayubu, mala muchiaane nga chimbosio che khukhwosia sikila mwabeene. Ne omukholi wase Ayubu, acha khumusaayila, sikila nja khufukiilila lisaaya liewe, mala ndekhe khumukholela khuloondekhana ne busilu bwenywe. Sikila se mwalomaloma bung'ali khuloondekhana nase nga omukholi wase Ayubu akholile tawe.”

⁹Nono Elifasi Omutemani, Bilitati Omushuhi, ne Sofari Omunaamati, bacha bakhola nga Wele Omunyali Owa Bioosi aababoolela, mala Wele Omunyali Owa Bioosi aafukiilila lisaba lia Ayubu.

¹⁰ Nio Wele Omunyali Owa Bioosi aakobosia kimiaandu kia Ayubu, nga ne aamala khusaayila basaale bewe, mala Wele Omunyali Owa Bioosi aamuelesia kimiaandu khabili khukhila nikio aaba nakio lutaayi.

¹¹Mala bawandaaye ne bakooko boosi ba Ayubu, nende boosi babamumanya lutaayi bamukeniia mala baalia siakhulia naye munju mwewe. Bamukholela siisa siabwe mala bamuoleelesia khu butinyu bwoosi nibwo Wele Omunyali Owa Bioosi aamureerakho. Nio buli mulala amuelesia chirupia ne embete eye sahabu.

¹²Wele Omunyali Owa Bioosi aabiita chindaalo chimaliilisi cha Ayubu lukali khukhila che mu khurakikha. Ayubu aaba ne kamakheese chielefu ekhumi na chine, chingamia chielefu sita, chikhaafu chielefu chibili, ne chifarasi chewe chikhasi eelefu ndala.

¹³Lundi aaba ne babaana basoleeli saba ne bakhaana bataru.

¹⁴Nio aalaanga omukhulu ali Yemima, ne omuloonda ali Kesia, ne ookhola khataru ali Kereni-apuchu.

¹⁵Mala mu sibala esio sioosi se babaamo bakhasi balayi nga bakhaana ba Ayubu tawe. Nono raarawabwe aabakabania kumukabo alala ne bawandaayabwe.

¹⁶Enyuma wa kano Ayubu aamenya kimiiko emia ndala ne kamakhumi kane, mala aabona babaana bewe ne babaana be babechukhulu bewe ne bisoni biewe.

¹⁷Nio aafwa ne ali omusaakhulu korio.