Read lubukusu Ayu. 5 Bible Online

Ayu. 5 - lubukusu bible

Ayu. 5

¹“Ayubu luno laanga, aliio omundu yesi yesi olakhukobosia ku? Aliio malaika yesi yesi onyala aakhuyeeta ku?

²Ng'ali lirima liira omusilu ne libuba liira okhali ne limanya tawe.

³Nabona basilu ne baindiaala, ne kakhali nalaama khangu chingo chabwe.

⁴Babaana babwe se banyoola kumuleembe tawe, baapisibwa siibi mu chikoti, ne mbao obasoola tawe.

⁵Babaandu be njala bakesa biakhulia bie basilu, aakhaba nende bibiamela mu mawa, ne babaandu be kumuliuliu bekoomba kimiaandu kiabwe.

⁶Sikila buchuuni se bwamanga mwipukhuulu tawe, namwe butinyu se burubura mwiloba tawe,

⁷Ne kakhali omundu asaalwa khunaania nga chinjaso chiicha mu ngaaki.

⁸Abaanga bali ese niye ewe, andi nakoboleele Wele, ne khumuboolela butinyu bwase.

⁹Wele ookholanga kamakhuwa ke khuukia, ke khuukia kamakali kakhanyala kabalikha tawe,

¹⁰niye ooreeranga efula ekwa khu sibala, lundi achukhiilila kimikuunda.

¹¹Aniinia angaaki abo babeboombia, ne khuelesia kumuleembe abo balila.

¹²Akoyaania kamarekekha ke bamayaanu, khwako se banyala khukhola niko barekeekhe tawe.

¹³ Aambila bakesi mu bukesikesi bwabwe, lundi akoyaania kamarekekha ke baabacha.

¹⁴Babuubukila mu siilima akhaba ne kuli kumuusi, akhaba mwiangilwe babuubuka nga siilo.

¹⁵Ne kakhali Wele aonia bafuubi khukhwama mu lifwa, aonia babanani khukhwama khwaabo baali be kamaani.

¹⁶Nio bataambi bali ne lilieyikina, ne Wele asisia abo bakhali ng'ali tawe.

¹⁷ Ng'ali niye Wele abiiya ali ne khabi, khwako okhalekeelesia liukuuma lia Wele Owe Bunyali tawe.

¹⁸ Sikila areera kamakoonjo lundi akasilikha, aumisianga lundi aonia.

¹⁹Acha khukhuonia kamakhabi sita, aakhaba mu makhabi saba ne se oliba ne butinyu tawe.

²⁰Mu njala acha khu khusikula khukhwama mu lifwa, ne mwiie acha khu khuonia khukhwama mu lifwa.

²¹Ocha khukiswa khukhwama khu bukhupe bwe lulimi, ne se ocha khuria libuna ne liicha tawe.

²²Ewe ocha khuchekheelela libuna ne njala, namwe se ocha khuria chisaang'i che mundaa tawe.

²³Kimikuunda kiowo se kicha khubamo kamabaale tawe, ne chisaang'i che mundaa chiicha khuba ne kumuleembe ne nawe.

²⁴Nio ocha khumanya oli enju yowo eli ne kumuleembe, ne oyama kamakheese kowo, ocha khukanyoola koosi ne kali bulayi.

²⁵Ewe ocha khumanya oli lisaaye liowo licha khuba likali, lundi liliba nga bunyaasi bwe khu sibala.

²⁶Ewe ocha khufwa ne oli omukofu lukali, nga engaanu elabile ne ekesibwa mu siise siayo.

²⁷Ayubu lola, lino khwaliboone khuli lili lia ng'ali, nono luno liulile mala olimanye khulwe bulayi bwowo.”