Read lubukusu Ayu. 6 Bible Online

Ayu. 6 - lubukusu bible

Ayu. 6

¹Nio Ayubu aakobosia ali,

²“Abanga buchuuni bwase bukelwa, ne butinyu bwase bwoosi burwa khu bikelo,

³bwakhabeele busiro khukhila kumuyekhe kwe mu nyanja, khwako kamakhuwa kaase kabeele ka khangu.

⁴Sikila buembo bwa Wele Owe Bunyali Bwoosi buli mwise, ne ese nywa buchiba bwabwo, kumunaanio kwa Wele kuli khwise.

⁵Punda mulia enyala yalila ne eli ne bunyaasi? Namwe ekhaafu emoloolela mu maayilwe ku?

⁶Ne naanu onyala aalia siakhulia siikhalimo echamu namwe chumbe tawe? Chamu siina eeli mwiki liwaanga?

⁷Se ndikho ne kameelu khu siakhulia nga sisienesio tawe, siakhulia nga esio sirio sindwaasia.

⁸“Ng'ali nanyoolakho busa nisio saba, lundi Wele aambeelesie nisio nenya,

⁹abanga Wele naye aasiimile aanjire, aakhalekhuulile kumukhono kwewe kwanjira.

¹⁰Andi lino nilio libeele buoleelesi khwise; andi nabeele ne busangaafu akhaba mu buchuuni bukhawa buno tawe. Sikila se naloba kamakhuwa ka Wele ooli Omutakatifu tawe.

¹¹Ndi ne kamaani ke khuchiililila khuliindiilila? Ne khutabusia khwase khuliba khuriena nio nikhaliilikhe?

¹²Eku, kamaani kase kali kamaani ke kamabaale, namwe kumubili kwase kuli kwe kumukasa?

¹³Ng'ali se ndi nende sinyala sianjeeta tawe, lundi se ndi nga nyala nanyoola buyeeti tawe.

¹⁴“Omundu okhekesia bulayi khu wasie tawe, aba aalekhile khuria Wele Owe Bunyali Bwoosi.

¹⁵Ne kakhali basaale base babeele baabacha nga luluuchi lubisianga busa mu fula mwong'ene, bambea ese nga chinjichi chiteenyanga mu milengaala.

¹⁶Nga chinjichi chichiichuulemo kamaarara, lundi nicho ebarafu ekhingile.

¹⁷Ne kakhali siise sie siimiyu, chiwaao, chiteenya kumuumu ne kwilakho.

¹⁸Baboofuli barura khu ngila chacho, baniina khucha mu sichiimi ne khufwiilamo.

¹⁹Baboofuli khukhwama Tema bayiima kameechi, baboofuli khukhwama Sheba bakayiima ne lilieyikina.

²⁰Bafwa kimiooyo sikila baba ne lilieyikina, boola siimbi a njichi echo ne bawechekheelela.

²¹Ne enywe mwesi mwabeele nga chinjichi echo khwise, mubona butinyu bwase ne muba ne buuri.

²²Eku, ese nalomilekho ndi, mumbelesie siianwa? Se nalomile ndi ndungire asooya khukhwama khu miaandu kienywe tawe.

²³Se nalomile ndi sikule ese khukhwama mu makhono ko musiku namwe khukhuusikula ese khukhwama khu khayiinga tawe.

²⁴“Njekisie ese, mala ndasila, mboolele bubi bwase, ne ese ndaulila.

²⁵Kamakhuwa ka ng'ali kali kachuunia, ne kakhali likaambila lienywe nalio, siina nisio lingaania?

²⁶Mwibaasia muli munyala mwabiiya kamakhuwa busa, mubukula kamakhuwa ko omundu owe butinyu khuuba embeo busa?

²⁷Lundi munyala mwapa chikura khu bafuubi, ne khukusia omusaale wenywe!

²⁸Ne kakhali luno, ne musiima ndole, se ndamubea enywe mwabeene tawe.

²⁹Kaluukhasia chinganakani chenywe, mukhaba bakhali ng'ali khwise tawe. Luno kaluukhasia chinganakani chenywe, bulayi bwase se bulikho bufukiililwa tawe.

³⁰Niko ndoma kali kamamayaanu? Ese se ndi ne likesi lie khumanya kamakhuwa kamabi tawe ku?