Read lubukusu Ayu. 7 Bible Online

Ayu. 7 - lubukusu bible

Ayu. 7

¹“Omundu se ali ne kimilimo kimiaandalafu khu sibala? Bulamu bwewe buli nga chindaalo cho mukholi owe kumuruungo kwa buli ndaalo?

²Ali nga nasioobi owekoomba sisiiniini, nga omukholi olindiilila kumuruungo lukali.

³Ne kakhali kimieesi kikhalimo siindu tawe nikio kumukabwa kwase, ne buli siilo butinyu bwong'ene.

⁴Ne ngona asi nireeba ndi, bukhasie asiina ninyokhe? Ne kakhali siilo sili sileeyi, mala ndengeecha khukhwola nga busia.

⁵Kumubili kwase kwechula chinyeende ne kamakoonjo, siikhoba siase sibiimba nio sikelao situbukha kamayila.

⁶Chindaalo chase chibira khangu khukhila esindani eyo munabi, chindaalo chiwa lilieyikina ne likhaliio tawe.

⁷Ee Wele, khebulila oli bulamu bwase buli busa kumuuya, emoni yase se khabonekho kamalayi lundi tawe.

⁸Omundu oumbona se akhambonekho lundi tawe, okhambeenje ne kakhali ese khabe nachiile.

⁹Bulayi bwene nga lifuumbi ne liwao, abo baacha emakoombe se bakobola lundi tawe.

¹⁰Se bakobola munju chabwe lundi tawe, namwe abuundu niio baamenyanga se akhebulilwa lundi tawe.

¹¹Khwako se nyala nasila tawe, ndalomaloma mu buchuuni bwe kumwoyo kwase, ndeloocha mu buchuuni bwe kumubili kwase.

¹²Eku, ese ndi enyanja, namwe kuremu, nio undeekho omuliindi?

¹³Ndoma ndi, ‘Sitanda siase silamboleelesia, bulili bwase bulaboombia liliiloocha liase,’

¹⁴Ne ewe undikhirisia ne kamarooro, lundi undaamo buuri khubirira mu malola,

¹⁵nio ndobore khukhwekoka ne lifwa khukhila buchuuni buno.

¹⁶Nabiile bulamu bwase, se ndamenya khulwa mindali tawe. Ndekhe mbe, sikila bulamu bwase buli kumuuya busa.

¹⁷ Omundu ali siina nio ewe omubukule khuuba owe bukhala khwiwe? Omundu ali siina nio ewe ore chinganakani chowo khu niye?

¹⁸Ewe omukeendelela khumumenieelesia buli mutikhinyi, khumukela buli siise?

¹⁹Olalekha liina khu khundoleelela? Se undekha khaba namila mare?

²⁰Ewe omumenieelesi owe babaandu, naaba ne khola bubwoni, aba siina nisio kholile khwiwe? Siina sikila ne weluungikha ese seng'ene? Siina sikila luno ese ne ndi busiro khwiwe?

²¹Siina sikila ne okhambeela bubwoni bwase tawe? Se onyala wandusiakho bumayaanu bwase tawe ku? Sikila luno ndakona mu siliindwa, ewe olambeenja ne kakhali se ndabao tawe.”