Read lubukusu Ayu. 8 Bible Online

Ayu. 8 - lubukusu bible

Ayu. 8

¹Nio Bilitati Omushuhi aakobosia ali,

²“Olaloma kamakhuwa kano khukhwola asiina? Kamakhuwa kakaama mwiwe kali nga embeo engali.

³Eku, Wele akhiikhanga bung'ali? Namwe Omunyali Owa Bioosi akhiikhanga kaali ka ng'ali?

⁴Kaaba bali babaana bowo bakhola bubwoni khu Wele, ne niye abaelesia kumunaanio khulwe bumayaanu bwabwe.

⁵Ewe waaba noyiima Wele ne khusaba kumwalaalo kwo Oyo Owe Bunyali Bwoosi,

⁶waaba ne oli omukwalaafu lundi omuluungi, ng'ali, alakhuyeeta ewe, alakhukholela ewe nga wenyekha okholelwe.

⁷Ne akhaba lirakikha liowo ne liaba likeekhe, chindaalo chowo chimaliilisi chiicha khuba che buiinda bukali.

⁸“Khusaba oreebe khu ke chiselukho che khaale, mala wibaasie khu niko bakuuka babwe beyika.

⁹Sikila efwe khwasaalilwe likolooba busa, se khumanyilekho sisiindu siosi siosi tawe, chindaalo chefwe khu sibala chili nga sisiiniini.

¹⁰Babaandu balakhweyikia, bakhuboolele, mala balome khuloondekhana nende niko bamanya.

¹¹“Bisele binyala biachoela niio sireende sikhali tawe ku? Binyala bianyoolekhana niio kameechi kakhali tawe ku?

¹²Kameechi kaaba ne kateenya nibio binyoa khukhwooma, ne bisiili bitiiti ne bikhoola khuremwa tawe.

¹³Babaandu babebilila Wele bali nga bisele ebio, lilieyikina liaabo bakhali ne Wele tawe likhatibe.

¹⁴Nibio beyikina bitubundukha busa. Nibio beyikina bili nga buusi bwe lububi.

¹⁵Lekha beaambe khu nju yabwe, se elema bulayi tawe. Lekha bakitiile, se elanyalikhana khutiilwa tawe.

¹⁶Bali nga kimirongooro kikalaasia lukali kumuumu ne kufwa, kimili kiakio kifuunikha kumukuunda.

¹⁷Kimili kiakio kiaboranila mu situumi sie kamabaale, kinyoola bulamu asi mu lwanda.

¹⁸Ne omundu aakisiuula khukhwama abuundu wakio ao, abuundu ao akhakiikaane aloma ali, ‘Ese khaamubonakho enywe tawe.’

¹⁹Lola, esio nisio sisiakamo sie khoyo eye bamayaanu abo, ne babaandi becha mala babukula bubweyaangu bwabwe.

²⁰Lola, Wele se acha khuloba omundu okhali ne kamabi tawe, namwe ayeete bamayaanu tawe.

²¹Ne kakhali acha khukhukhola ewe ochekhe, lundi uupe luyoka lwe khoyo.

²²Acha khuambia chisoni abo ba bakhubiila ewe, chingo che bamayaanu chicha khuwao.”