Read lubukusu Ayu. 9 Bible Online

Ayu. 9 - lubukusu bible

Ayu. 9

¹Nio Ayubu aakobosia ali:

² “Ng'ali manyile ndi lili lirio. Ne kakhali omundu busa anyala aaba owa ng'ali ebweeni wa Wele ku?

³Omundu aaba ne enya khuyingana ne Wele, Wele anyala amureeba kamareeba eelefu ndala, niko akhanyala aakobosia akhaba lilala tawe.

⁴Wele ali omukesi lukali lundi owe kamaani kamakali, mbao omundu onyala aayingana naye mala aakhila tawe.

⁵Wele auuyisia bikulu omundu ne akhamanya tawe, lundi abionakaka ne akhalaale.

⁶Wele asisiikha sibala sinyokha mu bukono bwasio, mala chinjeko chasio chesisiikha,

⁷akaania enyanga mala elekha khurura, akhiingilila buwaanga bwe ching'enieesi,

⁸niye yeng'ene owarao likulu, ne khuswalakilila sisieeno.

⁹ Wele niye owakhola ching'enieesi nga Kuunani, Orioni, ne Kilimia ne ching'enieesi che bunafubo.

¹⁰Akhola bibiindu bikali bikhamanyikhana tawe, akhola kamayia kamakali kakhabalikha tawe.

¹¹Wele ambirakho, mala se mubona tawe, akeenda nase ne se mumanya tawe.

¹²Abukula nisio enya mala mbao omukaania tawe. Mbao omureeba ali, ‘Olikho okhola siina?’ Tawe.

¹³“Lirima lia Wele se liwechanga tawe, aula basiku bewe babayeeta Rahabu sisieeno sie mu meechi.

¹⁴Nono ese nyala namukobosia ndiena, namwe nyala nayiingana naye ndiena?

¹⁵Nakhaba ne khali ne kamabi se nyala nakobosiana ne naye tawe, khoya sabe akholele siisa.

¹⁶Naaba ne mulaanga mala afukiilila, se nakhasuubiile ndi beele andekereesia tawe.

¹⁷Sikila wambuuchile ne khuungu, ne khu khuundasa ese kamakoonjo kakhali ne sifuno tawe,

¹⁸se andekha naeela tawe, ne kakhali anjichusia buchuuni.

¹⁹Ne kali kamaani Wele ali nako khukhukhila ese ne buli bung'ali se aliio onyala aloma bubi bwewe tawe.

²⁰Nakhaba ne khali ne bubi tawe, kumunwa kwase kumwene kulakhalakila, nakhaba ne khali ne kamabi tawe alaamanya khuba omukhiikha.

²¹Ese se ndi ne kamabi tawe, ne kakhali se nifumia samwene tawe. Ese ndeka bulamu bwase.

²²Koosi kali malala, khwako ndoma ndi, Wele abunia bakhali ne bubi ne bamayaanu sitube.

²³Butinyu ne bureera lifwa litundubikha, Wele achekheelela bakhali bamayaanu tawe.

²⁴Sibala ne siba mu bunyali bwe bamayaanu, Wele abofusia bakhalaki basio, aaba ne akhali Wele okhola kano tawe, naanu niye?

²⁵“Chindaalo chase chiiyuula khukhila omutimi we chimbilo, chiwao khangu ese ne khabona silayi mu nicho tawe.

²⁶Bulamu bwase bubira nga liliaaro litima khangu, nga efuruusi neyuula biakhulia biayo.

²⁷Nakhaloma ndi nibilile lilieloocha liase, ndi ngalukhasie bubeeleli bwase mala sangaale,

²⁸ese siili ne buuri khu buchuuni bwase bwoosi, sikila manyile ndi ewe Wele wayimbukula ese khuba omumayaanu.

²⁹Namalile khunyoolekhana khuba omumayaanu, siina sikila nono khole kimilimo kikhali ne bukhala?

³⁰Nakhesiinga ne sabuni, mala narumikhira esabuni emalakho liikho lioosi,

³¹ewe Wele olimwaata ese mwiloo, akhaba chingubo chase ching'ene chilimbiila.

³²Wele se ali omundu niye ese nyala nakobosia niko aloma tawe, se khunyala khwakaanana ne naye e bakhalaki tawe.

³³Ne se aliio oonyala aareera kumuleembe akari wewe ne nase tawe, oonyala abisie khuloondekhana ne bulomani bwefwe.

³⁴Kaaba bali se aakhupa ese tawe, lundi se aandekha naaba ne buuri bukali sikila niye tawe,

³⁵ese ndalomaloma ne khali ne buuri sikila niye tawe, sikila ese se ndi nga nibaasibwa khuuba tawe.”