Read lubukusu Chiny. 10 Bible Online

Chiny. 10 - lubukusu bible

Chiny. 10

¹Ee Wele Omunyali Owa Bioosi, siina sikila noba sinao? Siina sikila ne wikisa siise nisio ese khupisibwa siibi?

²Mu khwebonia babooni bapia bataambi siibi, lekha bakwe mu mireko nikio babeene bareka.

³Babooni bebonia sikila kamabi niko bekoomba, be kumuliuliu balaama ne khukhwekaana Wele Omunyali Owa Bioosi.

⁴Babooni mu khwebonia khwabwe baloma bali “Wele se akhamanye tawe” Kamebaasio kabwe koosi kali mbo, “Wele se aliio tawe.”

⁵Banyoolanga buli siindu nisio benya. Se bamanyile likhalaka lia Wele tawe. Basiniola basiku babwe.

⁶Baloma ali, “Se khulikhilwakho tawe, Se khulibakho mu butinyu tawe.”

⁷ Lilomaloma liabwe liechula bilaamo, bubeeyi ne liriikhirisia, Bali khangu khuloma ke siikhonde ne kamabi.

⁸Bekisa mu bichakha khu ngila mu birekere khukhwibuulila abo bakhali ne kamabi tawe. Bekhiina nibo benya khwira,

⁹babekhiina niio bekisile nga etalang'i. Bekhiina bataambi, babatiilila mu mireko kiabwe ne khubakhuruura.

¹⁰Bakhenyala tawe beerwa, ne kamaani nga ka wanangali.

¹¹Babooni baloma bali, “Wele se abona tawe! Afunyikhiliile, se anyala aabona tawe.”

¹²Ee Wele Omunyali Owa Bioosi, ukuuma babooni abo! Okhebilila babapisibwa siibi tawe!

¹³Siina sikila omwoni ne alekelesia Wele? Siina sikila ne aloma ali, “Se alimbukuuma tawe?”

¹⁴Ne kakhali ewe obona, omanyile be butinyu ne siibi, mala werekekha khubayeeta buli lwoosi.

¹⁵Rusiao bunyali bwo mwoni, muukuume khulwe bubwoni bwewe, khukhwola bakhakholakho bario lundi tawe.

¹⁶Wele Omunyali Owa Bioosi ali omwami owa buli lwoosi, Be Chikholo che mu sibala siewe balibuna.

¹⁷Ee Wele Omunyali Owa Bioosi, olirekeeresia lisaba liabo bakhenyalila tawe. Olibaramo kumwoyo.

¹⁸Olikholela bung'ali bafuubi ne naabo babaminikha nio babaandu busa bakhareerakho liiteremia lundi tawe.