Read lubukusu Chiny. 102 Bible Online

Chiny. 102 - lubukusu bible

Chiny. 102

¹Lisaba lio omundu oli mu buchuuni ne aluile lundi ne eloochela Wele Omunyali Owa Bioosi kakewe koosi. Ee Wele Omunyali Owa Bioosi, rekeeresia lisaba liase, mala oulile lilila liase khulwe buyeeti!

²Okhakisa bubweni bwowo ne ndi mu butinyu tawe! Reka liiri liowo khwise, ndekeeresie mala unjeete bwangu!

³Sikila chindaalo che bulamu bwase chiwa bwangu nga liliisi, ne bikuumba biase biburukha nga kumulilo kwe kumukuba.

⁴Nawechekheleele nga bunyaasi bunialile, se ndi ne kumwoyo kwe khulia siakhulia tawe.

⁵Khulila khwase khuli khukali, nabeele kamakuumba busa.

⁶Ndi nga engosia eeli mu sichiimi, nga kusikhiikhi mu makuunda.

⁷Ngona burengeecha, ndi nga enyuni eyiiyuuma ne eli khu lusuli lwe nju.

⁸Basiku base bakhoma ese biise bioosi, abo babanjekha ese bataacha lisina liase khulaama babaandi

⁹Likokhe nilio siakhulia siase, ne kamasika kase katubaana nende nibio nywa.

¹⁰Khulwe lirima ne bukhalafu bwowo, wambukula ese mala wamwaata.

¹¹Bulamu bwase buli nga sisiiniini sie ekolooba, ndikho niaala nga bunyaasi.

¹²Ne kakhali ewe ee Wele Omunyali Owa Bioosi wamiia buli lwoosi, lisina liowo liliio khu selukho choosi.

¹³Ewe olirakikha khukholela lukoba lwa Sayuni siisa, sili siise sie khulwaala siise esio sioolile.

¹⁴Akhaba ne lwonakaakwe, bakholi bowo balusiima, akhaba ne luli mwibuna, balukholela siisa.

¹⁵Chikholo chiliria Wele Omunyali Owa Bioosi, ne babaami be khu sibala boosi baliria luyali lwewe.

¹⁶Sikila Wele Omunyali Owa Bioosi oliombakha Sayuni, alibonekha mu luyali lwewe.

¹⁷Akhaulile lisaba liabo babanjuukhwe, ne se alilekelesia lisaba liabwe tawe.

¹⁸Lekha kano kaandikilwe chiselukho chichiicha, nio babaandu bakhebulwa tawe bafumie Wele Omunyali Owa Bioosi.

¹⁹Wele Omunyali Owa Bioosi aalola asi khukhwama abuundu wewe angaaki atakatifu, aalola asi khu sibala khukhwama mwikulu.

²⁰Aaulila bililo bie baboe, mala alekhuula abo babakhalakilwa khufwa.

²¹Khwako lisina liewe liliboolwa mu Sayuni, mala afumisibwe mu Yerusalemu.

²²Chikholo ne bubwami bwe bibala biliicha alala ne khusaaya Wele Omunyali Owa Bioosi.

²³Wele Omunyali Owa Bioosi aamalilemo kamaani ne siili muele, embiisie bulamu bwase.

²⁴Ee Wele, okhandusiao ne siili khusaakhuluwa tawe. Ee Wele Omunyali Owa Bioosi, oliio buli lwoosi,

²⁵ khaale akho, wabaang'ana kumusiingi kwe sibala, lundi waloonga likulu ne kamakhono kowo wamwene.

²⁶Ebio biliwao ne kakhali ewe olibao, bioosi biliwao mala bitaambe bukhala nga engubo ekhale. Ewe olibimwaata nga chingubo mala biweo.

²⁷Ne kakhali ewe orama busa orio, ne bulamu bwowo se buwa tawe.

²⁸Babaana be bakholi bowo balimenya mu muleembe, ne mu buliindi bwowo, lisaaye liabwe liliba ne kumuleembe.