Read lubukusu Chiny. 103 Bible Online

Chiny. 103 - lubukusu bible

Chiny. 103

¹Lulwimbo lwa Daudi Ee mwoyo kwase fumia Wele Omunyali Owa Bioosi, nende biili mwise bioosi, bifumia lisina liewe litakatifu!

²Ee mwoyo kwase fumia Wele Omunyali Owa Bioosi, ne okheebilila bulayi bwewe bwoosi tawe.

³Ookhubeelanga bubwoni bwowo bwoosi, ne khuonia bulwaale bwowo bwoosi.

⁴Ookhusikulanga ewe khukhwama mwifwa, ne khu khuraakho busiime bwewe buukhawa tawe ne siisa.

⁵Akhwikusianga ne kamalayi mu bulamu bwowo bwoosi, nio buele bwowo buba ne kamaani lundi nga efuruusi.

⁶Wele Omunyali Owa Bioosi arusia bukhalaki bulayi khwaabo bapapisibwa siibi, ne khubakholela ke bung'ali.

⁷Eekesia Musa chingila chewe, ne khulekha Baisiraeli babone bikholwa biewe bie khuukia.

⁸ Wele Omunyali Owa Bioosi ali owe siisa ne kumwalaalo, ali kalaa mu khuambwa lirima mala busiime bwewe bukhawa tawe buli bukali.

⁹Se achiililila khurafua busa tawe, se ali ne lirima buli lwoosi tawe.

¹⁰Se akhuukuuma efwe nga khukhoyelwa tawe, namwe akhukholele efwe khuloondekhana nga bubwoni ne bubi bwefwe buli tawe.

¹¹Busiime bwa Wele bwa buli lwoosi buli bukali, khwaabo bamuelesia niye luyali, nga likulu ne lili angaaki lukali khukhwama khu sibala.

¹²Wele arusiao bubwoni bwefwe abuyila ataayi, nga buleeyi bwe khukhwama ebukwe khukhwola mumbo.

¹³Wele Omunyali Owa Bioosi akholela siisa abo bamuelesia niye luyali, nga paapa ne akholela siisa babaana bewe.

¹⁴Sikila amanyile nga efwe khwabuumbwa, amanyile ali efwe khuli liloba busa.

¹⁵Ne omundu, bulamu bwewe buli nga bunyaasi, bumulikha nga siimuli sie mundaa,

¹⁶mala ekhuungu esiuucha, ne sirurao, mala abundu aasio se asimanyakho lundi tawe.

¹⁷Ne kakhali busiime buukhawao tawe bwa Wele Omunyali Owa Bioosi bulibaao buli lwoosi, ne bulayi bwewe khu selukho choosi khwaabo bamuelesia niye luyali,

¹⁸abo baliinda endakaano yewe, ne khuria kamalaka kewe.

¹⁹Wele Omunyali Owa Bioosi amiia khukhwama mwikulu, ne bubwami bwewe bwamiia buli abuundu.

²⁰Fumia Wele Omunyali Owa Bioosi, ee enywe malaika bewe, enywe be kamaani muria kamalaka kewe, ne khuulila niko aloma!

²¹Fumia Wele Omunyali Owa Bioosi enywe banamae bewe mweesi, enywe bakholi bewe mukhola lilienya liewe!

²²Fumia Wele Omunyali Owa Bioosi enywe bibuumbe biewe bioosi, mufumie niye buli abuundu niio ali omuruki. Ee mwoyo kwase fumia Wele Omunyali Owa Bioosi!