Read lubukusu Chiny. 104 Bible Online

Chiny. 104 - lubukusu bible

Chiny. 104

¹Ee mwoyo kwase fumia Wele Omunyali Owa Bioosi! Ee Wele Omunyali Owa Bioosi, Wele wase, oli omukali lukali! Ewe wechula bunyali ne luyali,

²Webotookheleesie buwaanga nga chingubo. Wakalaasia likulu nga liiema,

³ne khukhwombakha lukoba lwowo khu meechi ke angaaki. Okhola kamafuumbi kaba likaari liowo, ne khutimila khu ndaa che mbeo.

⁴ Okholanga embeo eba nga barumwa bowo, ne kumulilo ne chinjaso chakwo chiba bakholi bowo.

⁵Ewe wakhwikha sibala khu musiingi kwasio, ne se silisisiikha tawe.

⁶Ewe wasibiimba ne enyanja nga osifwara engubo, mala kameechi kafuuma bikulu.

⁷Nga warafwira kameechi, kelukha, nga kaulila ne orafuwa lukali, karekukha bwangu.

⁸Kabirira khu bikulu ne khukhwiikha mu matooma, khukhwola abuundu niio ewe wakarekekhera.

⁹Ewe warao lulwakha nilwo kakhanyala kabirakho tawe, nio kakhechula khu sibala lundi tawe.

¹⁰Ewe okhola chisebele ne chifututusia mu matooma, ne chinjichi akari we chingulu.

¹¹Chiaana kameechi ke khunywa khu saang'i che mundaa, chipunda che mundaa chinywamo.

¹²Chinyuni chombakha biswi ne khukhwimbila khu mirongooro, kiili embi ne chinjichi echo.

¹³Oreranga efula khu ngulu khukhwama mwikulu, lundi wechusie khu sibala kumwalaalo kwowo.

¹⁴Okholanga bunyaasi bumela chikhaafu chaye, ne bimelwa nibio omundu arumikhira, nio anyale khubiaala biakhulia,

¹⁵mala ang'oone endali emusangaasia, ne kamafura ke kumuseituni khumumiliisia, ne siakhulia khumuelesia niye kamaani.

¹⁶Kimitarakwa kia Lebanoni kinyoola efula engali, kimirongooro kia Wele Omunyali Owa Bioosi omwene, nikio aabiaala.

¹⁷Chinyuni chombakhakho biswi biacho, kamang'ang'a kamenyangakho.

¹⁸Chimbusi che mundaa chimenyile mu bikulu bileeyi, ne kicheu bikisa mu mabaale.

¹⁹Ewe waloonga kumwesi khukhwekesia biise bie kumwiiko, ne enyanga khukwa siise ne siolile.

²⁰Waraao biise bie siilo, ne chisaang'i che mundaa chirakikha khukeenda mu siilima.

²¹Chitalang'i ching'ana chiulukhuma ne chiaaya, ne chieenja siakhulia nisio Wele achielesianga.

²²Chiloota enyanga ne esoa, ne khukona mu mabina kacho.

²³Nio babaandu barura khukhola kimilimo kiabwe, mala bachiililila khukhola kimilimo khukhwola ekolooba.

²⁴Ee Wele Omunyali Owa Bioosi, ewe wabuumba bibiindu bikali po! Wabibuumba bioosi ne limanya likali. Sibala siechulamo bibuumbe biowo.

²⁵Eyo enyanja emboofu lundi embalaayi, nimwo bibuumbe biikhabalikha bimenyile, bibuumbe biboofu ne bitiiti sitube.

²⁶ Chimeeli chibirirakho, ne Lefiatani kwinyayilamo, kuwanaangali kwe mu nyanja nikwo ewe wabuumba.

²⁷Bibuumbe bino bioosi bikhweyikina ewe, obieelesie siakhulia mu biise bibienyekha.

²⁸Obieelesianga siakhulia mala bilia, oanaanga siakhulia, mala bilia bikura.

²⁹Ne obilekha, bieendekhelela, ne obinuula kumuuya kwe bulamu bwowo, bifwa ne khukobola mwiloba nimwo biama.

³⁰Ne kakhali no bieelesia kumuuya, bibao lundi, oana bulamu buyia khu sibala.

³¹Lekha luyali lwa Wele Omunyali Owa Bioosi lubeo buli lwoosi, lekha Wele Omunyali Owa Bioosi ekhoyele kumulimo kwewe,

³²oyo ololanga khu sibala mala siterema, otiilanga khu bikulu mala bituukha!

³³Ndiimbila Wele Omunyali Owa Bioosi mu bulamu bwase bwoosi, kheembe khufumia Wele biise bioosi bie bulamu bwase.

³⁴Lekha lulwimbo lwase lumusiimisie niye, sikila busangaafu bwase bwamanga khu niye.

³⁵Lekha babooni baali mu sibala babune, lekha bamayaanu baweo. Ee mwoyo kwase fumia Wele Omunyali Owa Bioosi! Fumia Wele Omunyali Owa Bioosi!