Read lubukusu Chiny. 105 Bible Online

Chiny. 105 - lubukusu bible

Chiny. 105

¹Khupila Wele Omunyali Owa Bioosi orio, boola bukali bwewe, boolela chikholo niko Wele Omunyali Owa Bioosi akholile.

²Yiimba khufumia Wele Omunyali Owa Bioosi, boola ke khuukia niko akholile.

³Sangaala khulwe lisina liewe litakatifu, lekha kimioyo kiabo basaayanga Wele Omunyali Owa Bioosi kiekhoye.

⁴Yiima Wele Omunyali Owa Bioosi, yiima kamaani kewe, yiima khubaao khwewe buli lwoosi.

⁵Enywe lwibulo lwa Aburahamu, omukholi owa Wele Omunyali Owa Bioosi, enywe lwibulo lwa Yakobo, omundu niye Wele Omunyali Owa Bioosi aarobora, khebulila ke khuukia niko Wele Omunyali Owa Bioosi aakhola, ne bukhalaki nibwo aana.

⁷Wele Omunyali Owa Bioosi ali Wele wefwe, bukhalaki bwewe buli buli abuundu mu sibala sioosi.

⁸Aliliinda endakaano yewe buli lwoosi, akholanga niko alaka khu selukho eelefu.

⁹ Endakaano niyo aakhola nende Aburahamu ne lisuubisia nilio echubila Isaaka.

¹⁰ Wele Omunyali Owa Bioosi aakhola endakaano ne Yakobo, endakaano elibaao buli lwoosi.

¹¹Aaloma ali, “Khakhuelesie sibala sia Kanaani, siliba kumukabwa kwowo wamwene.”

¹²Babaandu ba Wele baba batiiti busa, baaba baakwa mu sibala sia Kanaani.

¹³Bayiiyayiiya khukhwama mu sibala silala khukhwola mu siindi, khukhwama mu bwami bulala khukhwola mu buundi.

¹⁴ Ne kakhali Wele se aalekha omundu yesi yesi abaapie siibi tawe, akaania babaami khulwe khuliinda babaandu bewe ali,

¹⁵“Mukhakholela bakholi barobore base libi tawe, mukhaumisiakho bang'oosi base tawe.”

¹⁶ Wele Omunyali Owa Bioosi aareera enjala mu sibala siabwe, ne khurusiao biakhulia biabwe bioosi.

¹⁷ Ne kakhali aaruma omundu ebweeni wabwe, aruma Yosefu, owaba ne aakusibwa khuba nasioobi,

¹⁸ aaba ne buchuuni khu bikele khulwe chindeekwe, aafwara lusiinga lwe sichuuma mwikosi mwewe,

¹⁹khukhwola nga niko aaloma nga kecha kekholekha. Likhuwa lia Wele Omunyali Owa Bioosi liamwekesia niye khuba owa ng'ali.

²⁰ Nio omwami owa Misiri alaka alekhuulwe, omuruki owe chikholo amuelesia niye bulekhuule.

²¹ Aamuelesia bubwimeelesi mu bwami bwewe, ne khumuelesia buruki bwe sibala sioosi,

²²aamuelesia ne bunyali khu bemeelesi babaandi, ne bunyali bwe khukhwikisia bakeleki bewe.

²³ Nio Yakobo acha e Misiri, ne khuuba omukwa mu sibala esio.

²⁴ Wele Omunyali Owa Bioosi aelesia babaandu bewe babaana bakali, lundi aabakhola baaba ne kamaani khukhila basiku babwe.

²⁵Aakhola Bamisiri babiila babaandu bewe, ne khukholela bakholi bewe ke bubacha.

²⁶ Nio aruma Musa omukholi wewe, nende Aruni, niye omwene aaba ne aroboore.

²⁷Bakhola bikholwa bie bunyali bwa Wele, ne khukhola ke khuukia mu Misiri.

²⁸ Wele aaruma sisiilima mu sibala esio, ne kakhali Bamisiri se baloonda lilaka liewe tawe.

²⁹ Aakaluukhasia kameechi ke chinjichi chabwe kaaba kamafuki, ne khukhwira ching'eeni chabwe choosi.

³⁰ Sibala siabwe siechulamo chikhele, chikhele chechula akhaba mwichipi.

³¹ Wele aalaka mala chiisi ne biroboto, biebuusia mu sibala sioosi.

³² Wele aaruma kamaarara ne chimbeni khu sibala siabwe, mu bweyaangu bwe fula.

³³Onakaka kimisabibu ne kimituli kiabwe, ne khu khupa asi kimirongooro kioosi.

³⁴ Aalaka, mala chisike cheecha, chisike chingali chikhabalikha tawe,

³⁵chisike chalia bimelwa bie mu sibala bioosi, chalia biakhulia bie mu mikuunda bioosi.

³⁶ Wele eera babaana babele, munju che ba Misiri choosi.

³⁷ Nio arangirira Baisiraeli khurura e Misiri, Baisiraeli basuta efwesa ne esahabu, mala se abakhoo na mulala mu kholo chabwe owetuya tawe.

³⁸Bamisiri baria Baisiraeli, mala basangaala khulwe khurekukha khwe Baisiraeli.

³⁹ Wele aarao lifuumbi khubiimba babaandu bewe, ne kumulilo khubakhoselia siilo.

⁴⁰ Basaba mala Wele abareerera chisiindu, ne khubaelesia siakhulia sikali khukhwama mwikulu.

⁴¹ Wele ekula lulwanda, mala kameechi kalwamamo kamakali, kakhulukukhila mu siangalaamwe nga luluuchi.

⁴²Aakhebulila endakaano yewe endakatifu, khu mukholi wewe Aburahamu.

⁴³Khwako aarangirira babaandu barobore bewe khurura Misiri, mala beemba ne khukhwikhoya lukali.

⁴⁴ Mala abaelesia kamaloba ke chikholo chichiindi, ne khubalekha babukule kamasamba ke chikholo chichiindi,

⁴⁵nio babaandu bewe baulile engaani yewe, ne khuria kamalaka kewe. Fumia Wele Omunyali Owa Bioosi!