Read lubukusu Chiny. 106 Bible Online

Chiny. 106 - lubukusu bible

Chiny. 106

¹ Fumia Wele Omunyali Owa Bioosi! Ee khupila Wele Omunyali Owa Bioosi orio, sikila niye ali omulayi, sikila busiime bwewe bukhawa tawe buliio buli lwoosi!

²Naanu onyala aboola bikholwa bie khuukia bioosi bia Wele Omunyali Owa Bioosi? Naanu onyala amufumia niye nga kenyekhana?

³Bali basangaafu abo baria kamalaka kewe, bakholanga buluungi biise bioosi.

⁴Ee Wele Omunyali Owa Bioosi, ne wekesia babaandu bowo kumwalaalo, khebulile ese, ewe ne olikho obasikula, njeete,

⁵nio seesi mbone buyiinda bwe barobore bowo, nio seesi nekhoye mu busangaafu bwe kholo yowo, nio seesi netikite nende abo baali babowo.

⁶Efwe khwakholile bubwoni nga bakuuka befwe bosi, khwakholile bumayaanu, lundi khwakholile kamabi.

⁷ Bakuuka befwe nga baba mu Misiri, se babukula bikholwa biowo bie khuukia khuba siindu tawe, se bakhebulila bukali bwe busiime bwowo bukhawa tawe, ne kakhali baba bareengu khu owe Angaaki Lukali khu Nyanja eya Shamu.

⁸Ne kakhali aabaonia nga yaba aalakiilisia, nio ekesie bunyali bukali bwewe.

⁹ Aarafwira Enyanja eya Shamu, mala yateenya, mala abaraangirira khubira mu lusiba oli babirira khu siangalaamwe.

¹⁰Khwako aabaonia khukhwama mu makhono ke basiku, ne khubasikula khukhwama mu bunyali bwe basiku.

¹¹Mala kameechi katiimbia kera basiku babwe, se aliio akhaba mulala owasikala tawe.

¹² Nio basuubila niko aaloma, beemba khumufumia niye.

¹³Ne kakhali bebilila bwangu bikholwa biewe, se baliinda likaambila liewe tawe.

¹⁴ Ne kakhali baba ne kumuliuliu kumukali ne bali mu sichiimi, mala bara Wele mwikhako ne bali mu siangalaamwe,

¹⁵aabaelesia nisio benya, ne kakhali lundi aabarumirea bulwaale bubwiira.

¹⁶ Mu siangalaamwe omwo babaandu baba ne likhendekha khu Musa, nende Aruni, omukholi omutakatifu owa Wele Omunyali Owa Bioosi.

¹⁷Nio sibala siekukha mala siamila Tatani, ne khusiikha Abiramu ne lulwibulo lwewe,

¹⁸kumulilo kwakwa khu baloondi babwe, ne khukhwosia babooni abo.

¹⁹ Bakhola sifwaani sie moosi eye esahabu ne bali a sikulu sia Sinai, mala basisaaya,

²⁰babukula luyali lwa Wele mala barura, khu sifwaanani sie saang'i elia bunyaasi.

²¹Bebilila Wele, omuonia wabwe, owakhola ke khuukia mu Misiri,

²²bikholwa bie khuukia mu sibala sia Hamu, ne kamakhuwa ke khuriisia a Nyanja eya Shamu.

²³Khwako Wele aaloma ali alabunia babaandu bewe. Abaanga Musa omukholi wewe omurobore se aalomaloma ne Wele, mala ekoonjelela Wele akhaba ne lirima libunia babaandu bewe omwene tawe.

²⁴ Nio balekelesia sibala sisiimisia, sikila se basuubila endakaano eya Wele tawe.

²⁵Bamenya mu maeema kabwe ne beng'ulung'unya, ne se baulila ka Wele Omunyali Owa Bioosi tawe.

²⁶Khwako echuba ali, alibakhola babunile mu sichiimi,

²⁷ ne khusalanisia lulwibulo lwabwe akari we chikholo, ne khubaandakasia mu bibala tawe.

²⁸ Nio babaandu ba Wele ne bali e Peori bosi basaaya Baali, ne khulia chimbosio chichaanwa khu bawele bafu.

²⁹Baambia Wele Omunyali Owa Bioosi lirima khulwe bikholwa biabwe, mala lufu lwabakwamo.

³⁰Ne kakhali Fineasi enyokha asi ne khuukuuma babaakhola bubwoni, mala Wele arusiao lufu olwo.

³¹Ne sikholwa esio sibalikhila khu niye khuba, buluungi khukhwama khu selukho ndala khukhwola khu kiindi buli lwoosi.

³² Babaandu abo baambia Wele Omunyali Owa Bioosi lirima ne bali a sebele eya Meriba, mala Musa aba ne butinyu bukali sikila nibo.

³³Baambia Musa lirima likali, nio aloma niko akhebaasiisie bulayi tawe.

³⁴ Se babunia Be Chikholo nga Wele Omunyali Owa Bioosi ne alaka tawe,

³⁵ne kakhali batubaana ne chikholo, ne khuloonda kimiima kie chikholo.

³⁶Babaandu ba Wele basaaya bifwaani, mala sikholwa sino siaba kumureko kuubabunia.

³⁷ Baana babaana babwe basoleeli ne bakhaana, nga chimbosio khu bisieeno.

³⁸ Beera babaana bakhalikho ne bubi abo, mala sibala sianyaalutikha khulwe sifuki esio.

³⁹Baaba banyaalu khulwe bikholwa biabwe, ne se baba basuubilifu khu Wele tawe, bulayi bwene nga baeeyi.

⁴⁰ Khwako Wele Omunyali Owa Bioosi aba ne lirima likali khu baandu bewe, Wele asinyikhila babaandu bewe.

⁴¹Aabalekha mu bunyali bwabo bakhasaayanga Wele tawe, mala basiku babwe babaruka.

⁴²Basiku babwe babaapia nibo siibi, mala bayingililwa khuba asi we basiku abo.

⁴³Wele Omunyali Owa Bioosi asikula babaandu bewe kamakhabi kamakali, ne kakhali barobora khuba bareengu khu Wele ne khukwa mu bwoni bukali.

⁴⁴Ne kakhali Wele Omunyali Owa Bioosi abayeeta nga bamulililakho, mala aabaonia butinyu bwabwe.

⁴⁵Aakhebulila endakaano yewe sikila nibo, mala abakholela siisa khulwe busiime bwewe bukhawa tawe.

⁴⁶Wele aakhola ba baaba ne babaapia siibi boosi, babakholela siisa.

⁴⁷ Ee Wele Omunyali Owa Bioosi, Wele wefwe, khuonie efwe, mala okhukobosie ewefwe khukhwama mu kholo chichiindi, nio khukhuupile ewe orio ne khufumia lisina liowo litakatifu.

⁴⁸Fumia Wele Omunyali Owa Bioosi, Wele owe Baisiraeli, mu fumie niye khukhwama mindali khukhwola mindali! Lekha baandu boosi balome bali “Amina”