Read lubukusu Chiny. 107 Bible Online

Chiny. 107 - lubukusu bible

Chiny. 107

¹ Ee khupila Wele Omunyali Owa Bioosi orio sikila ali omulayi, sikila busiime bwewe bukhawa buliio buli lwoosi!

²Lekha basikulwe ba Wele Omunyali Owa Bioosi balome bario, nibo asikuule khukhwama mu butinyu,

³ne khubara alala khukhwama mu bibala, khukhwama ebukwe nende mumbo, khukhwama ebunaswa nende siafubo.

⁴Balala bayiiyayiiya ne bali akari we siangalaamwe, ne se banyala khunyoola engila ebayila mu lukoba nio bamenyemo tawe.

⁵Baba ne njala ne bulesia, mala batibia lilieyikina lioosi.

⁶Nio nga baba mu butinyu balilila Wele Omunyali Owa Bioosi, mala Wele aabasikula khukhwama mu butinyu bwabwe.

⁷Abaraangirira khu ngila engololofu, khukhwola nga ne boola mu lukoba bamenyemo.

⁸Lekha baapile Wele Omunyali Owa Bioosi orio khulwe busiime bwewe bukhawa tawe, khulwe bikholwa biewe bie khuukia nibio akholela babaandu!

⁹Sikila aelesianga be bulesia kameechi, ne siakhulia khu be njala.

¹⁰Balala bamenyanga mu khusulunya ne sisiilima, baboe baapwa siibi ne kiminyololo,

¹¹sikila baba bareengu khu malaka ka Wele, ne khuloba likaambila lioyo owe Angaaki Lukali.

¹²Balua lukali khulwe kimilimo kimitinyu, bakwiichanga asi, ne se abao obayeeta tawe.

¹³Nio nga baba mu butinyu balilila Wele Omunyali Owa Bioosi, mala Wele aabasikula khukhwama mu butinyu bwabwe,

¹⁴Wele abarusia mu khusulunya ne sisiilima, ne khukitulakamo kiminyololo kiabwe.

¹⁵Lekha baapile Wele Omunyali Owa Bioosi orio khulwe busiime bwewe bukhawa tawe, khulwe bikholwa biewe bie khuukia nibio aakholela babaandu!

¹⁶Sikila afuniakakanga bilibwa bie kumukasa, ne khukitulamo chinguulo che bichuuma.

¹⁷Balala baba basilu, baapwa siibi sikila bubwoni bwabwe,

¹⁸Se benya bapiekho khu siakhulia emoni tawe, mala benga khufwa.

¹⁹Nio nga baba mu butinyu balilila Wele Omunyali Owa Bioosi, mala aabasikula khukhwama mu butinyu bwabwe,

²⁰Wele aaruma likhuwa, mala abaonia, ne khubasikula khukhwama mu libuna.

²¹Lekha bapile Wele Omunyali Owa Bioosi orio khulwe busiime bwewe bukhawa tawe, khulwe bikholwa biewe bie khuukia nibio aakholela babaandu!

²²Lundi lekha baane chimbosio che khu khuupa orio, ne khuboola khu bikholwa biewe mu mienya kie khoyo.

²³Balala bakeendela khu nyanja mu chimeeli, ne bakholela bubwofuli khu nyanja chimbalaayi,

²⁴babona bikholwa bia Wele Omunyali Owa Bioosi, bikholwa biewe bie khuukia mu nyanja,

²⁵sikila aalaka, mala embeembesi engali yatasa khuucha, mala yenyosia bibuli khu nyanja.

²⁶Chimeeli echo chasutwa angaaki mala chesiikha mu siba. Mu butinyu burio bunyindaafu bwawa mu baandu,

²⁷betuya ne bataalitaala nga bameesi, mala busicha bwabwe bwaba bwa busa.

²⁸Nio nga baba mu butinyu balilila Wele Omunyali Owa Bioosi, mala Wele aabasikula khukhwama mu butinyu bwabwe,

²⁹aasisia embeembesi, mala bibuli biayeela.

³⁰Basangaala khulwe buoleelefu, mala Wele abayila mu muleembe mwifubukho nimwo benya.

³¹Lekha baapile Wele Omunyali Owa Bioosi orio khulwe busiime bwewe bukhawa tawe, khulwe bikholwa biewe bie khuukia nibio akholela babaandu!

³²Lekha bamuelesie niye luyali mu mukhung'aano kwe babaandu, ne khumufumia niye mu siikhasio sie babemeelesi.

³³Wele Omunyali Owa Bioosi aakhola chinjichi chateenyela elala, mala eemekha chisebele chikhabisia tawe.

³⁴Aakhola kamaloba ke ngakha khuba sisiangalaamwe, sikila bubwoni bwabo bamenyilemo.

³⁵Aakhola kamaloba ke ngakha khuba sisiangalaamwe, ne sibala sitakhamo kameechi siba chisebele.

³⁶Aalekha babaandu be njala bamenyemo, mala bombakha lukoba bamenyemo.

³⁷Bamiicha bumiicho mu mikuunda ne khubiaala kimisabibu, mala bakesa bibiaamo bikali.

³⁸Aabiita babaandu bewe chikhabi, mala banyoola babaana bakali, se aalekha kamatuuli ke chikhaafu chabwe kaboomba tawe.

³⁹Nga babaandu ba Wele baulwa ne khuchangalaasibwa, khulwe khu khupisibwa siibi lukali ne buchuuni,

⁴⁰Wele achekha ba baapianga nibo siibi, mala aabakhola bayiiyayiiya mu siangalaamwe, mukhali ne chingila tawe.

⁴¹Ne kakhali aasikula babanani khukhwama mu buchuuni bwabwe, mala aakhola lisaaye liabwe liatasikha lukali.

⁴²Baluungi babona kano mala basangaala, ne kakhali babooni boosi se baba, nende nilio balomamo tawe.

⁴³Lekha abo baali ne limanya baulile kamakhuwa kano, lekha bamanye busiime bwa Wele Omunyali Owa Bioosi bukhawa tawe.