Read lubukusu Chiny. 108 Bible Online

Chiny. 108 - lubukusu bible

Chiny. 108

¹Lulwimbo lwa Daudi Ee Wele, ese ndi ne lilieyikina likali! Ese ndiimba kimienya ne khu khufumia ewe! Siisimukha ee mwoyo kwase!

²Lituungu ne siilili siisimukha! Ese ndasiisimusia kamakhelebeende.

³Ee Wele Omunyali Owa Bioosi, ese ndakhupila ewe orio akari we chikholo, ese ndakhufumia ewe akari we chikholo.

⁴Sikila busiime bwowo bukhawa tawe buli bukali khukhwola angaaki we likulu, busuubilifu bwowo bwoola mu maleesi.

⁵Ee Wele, eebwa luyali angaaki we likulu! Lekha luyali lwowo lukaliie khu sibala sioosi!

⁶Khulwe bunyali bwowo khuonie efwe, ulila lisaba liase, nio babaandu nibo ewe wasiima basikulwe.

⁷Wele alomeele abuundu wewe atakatifu ali[54], “Mu bukhili bwase ndiaruramo lukoba lwa Shekemu mala ngabe babaandu base litooma lia Sukoti.

⁸Kileati sibala siase, Manase eyase, ekholo eya Efuraimu ekofia yase eye sibia, Yuda eruungu yase eye bubwami.

⁹Sibala sia Moabu sili lucho lwase lwe khusaabilakho, sibala sia Edomu sisiase, ese khupa luyoka lwe bukhili khu sibala sie Bafilisiti.”

¹⁰Ee Wele, naanu okhambile ese mu lukoba lusire? Naanu oliindangirira ese khucha Edomu?

¹¹Ee Wele, ewe sewakhulobile efwe tawe ku? Ee Wele, ewe se walobile khucha mwiie ne banamae befwe tawe ku?

¹²Khuyeete khuule omusiku, sikila buyeeti bwe babaandu se bukhola siindu tawe.

¹³Wele nali lubeka lwefwe khulakhila, alaula basiku befwe.