Read lubukusu Chiny. 109 Bible Online

Chiny. 109 - lubukusu bible

Chiny. 109

¹Lulwimbo lwa Daudi Ese khufumia ewe, Wele okhasila busa tawe!

²Babooni ne babeeyi banjibwaakala ese. Baloma ke bubeeyi khwise,

³lundi baloma kamabi khwise, baloma kamabi khwise kaakhali ne sifuno tawe.

⁴Akhaba ne nabasiima nibo, ne khubasabila khu Wele, se banjenya tawe.

⁵Bakholela ese kamabi ne mbakholeele kamalayi, lundi bambiila ne mbasiimile lukali.

⁶Robora omukhalaki omubi akhalakile omusiku wase, mala olekhe mulala khu basiku bewe omwene omusitake.

⁷Lekha bayaale naye mala anyolekhe khuba omubi, lekha akhaba khukhwechuba khwewe khubalikhe khuba bubwoni.

⁸ Lekha bulamu bwewe buwe khangu, lekha omundu okundi akhole kumulimo kwewe!

⁹Lekha babaana bewe babe bafuubi, ne omukhasi wewe abe namulekhwa!

¹⁰Lekha babaana bewe bayiiye-yiiye ne khusabiilisia, lekha babatimanie khukhwama[55] mu makuunda niko bamenyilemo!

¹¹Lekha bamubaanja babukule kimiaandu kiewe kioosi, lundi lekha baakwa babukule bie lukesi lwewe bioosi.

¹²Akhabao akhaba na mulala omukholela niye siisa, namwe alela bafuubi nibo aalekha tawe.

¹³Lekha be lisaaye bewe boosi bafwe, mala lisina liewe libililwe khu selukho eloondakho.

¹⁴Lekha Wele Omunyali Owa Bioosi akhebulile bubwoni bwe bakuuka bewe, lundi bubwoni bwa maawe bukhabeelwa tawe.

¹⁵Lekha Wele Omunyali Owa Bioosi akhebulile bubwoni bwabwe buli lwoosi, ne kakhali babeene bakhoya beebililwe elala!

¹⁶Omundu oyo se ebaasiakho ali abeemo siisa tawe, aapia siibi ne khukhwira bataambi, babanani nende bakhenyala tawe.

¹⁷Aasiima khulaama, lekha yesi alaamwe! Se aasiima khubiita babaandu chikhabi tawe, khwako omundu akhamubiitakho niye chikhabi tawe!

¹⁸Khulaama khu niye khwaba nga khufwara engubo, lekha bilaamo biewe bingile mu mubili kwewe nga kameechi niko anywa, lundi bingile mu makuumba kewe nga kamafura niko eakha!

¹⁹Lekha kamafuunikhe niye nga chingubo, ne khumubakho biise bioosi nga kumukoye nikwo eboyile mu sibuno.

²⁰Wele Omunyali Owa Bioosi, ukuuma basiku base mu ngila ng'ene eyo, abo balomanga kamabi kario khwise!

²¹Ne kakhali ee Wele Omunyali Owa Bioosi, Omwami wase, njeete nga ne welakana, mala usikule ese sikila bulayi bwe busiime bwowo.

²²Sikila ndi omutaambi lundi omubanani, ne kumwoyo kwase kuli mu buchuuni.

²³Ndi siimbi khuwao nga si siiniini sie ekolooba, ndi nga esike niyo ekhuungu etaamusia.

²⁴Kamasikamo kase kafwokoye khulwe khutaamba siakhulia, nabeele kamakuumba busa.

²⁵ Babaandu ne bambona ese, banjekha, basisiikha kimirwe kiabwe mu khunjekheelela!

²⁶Ee Wele Omunyali Owa Bioosi, Wele wase, njeete ese! Mbonie ese khulwe busiime bwowo bukhawa tawe!

²⁷Ee Wele Omunyali Owa Bioosi lekha basiku bamanye bali bunyali buno buli bubwowo, bali niwe oumboniisie ese!

²⁸Banyala balaama ese, ne kakhali ewe olambiita ese chikhabi. Lekha babakhupia ewe siibi baulwe;[56] ne ndekhe ese, omukholi wowo, sangaale.

²⁹Lekha basiku base bachangalaasibwe lukali, lekha babe ne chisoni chingali.

³⁰Ndiipila Wele Omunyali Owa Bioosi orio engali mu mumilo kwe angaaki, ndimufumia niye mwibuusiana lie babaandu,

³¹sikila Wele Omunyali Owa Bioosi aliindanga omubanani, ne khumuonia niye khukhwama khwaabo bamukhalakila khufwa.