Read lubukusu Chiny. 112 Bible Online

Chiny. 112 - lubukusu bible

Chiny. 112

¹Omundu oelesia Wele Omunyali Owa Bioosi luyali ali ne busangaafu, omundu owekhoyela khuria kamalaka kewe.

²Lisaaye liewe liliba ne bunyali mu sibala, eselukho eye baluungi eyo elibiitwa chikhabi.

³Kimiaandu ne buiinda biliba mu nju yewe, ne buluungi bwewe buliio buli lwoosi.

⁴Buwaanga bukhoselanga babaandu baluungi mu siilima, bukhoselianga abo baali ne siisa, kumwalaalo ne bung'ali.

⁵Omundu oli omulekhuule mu khwikopia ne akheenyelakho bukhala tawe ali bulayi, okholanga kimilimo kiewe mu bung'ali.

⁶Omundu omuluungi se alikhilwa tawe, alikhebulilwa biise bioosi.

⁷Se aria khunyoola elomo khu matinyu kaliio tawe, lisuubila liewe lili likali lundi ali ne lilieyikina mu Wele Omunyali Owa Bioosi.

⁸Se eendekhelela namwe aaba ne buuri tawe, ali na ng'ali ali alabona basiku bewe ne bakhilwa.

⁹ Ayeeta bataambi mu bulekhuule, mala kumwalaalo kewe se kuli ne sisiakamo tawe, aliba owe bunyali ne lukoosi.

¹⁰Babooni babona kano mala baambwa lirima, babiila omulayi lukali mala bafwa, lilieyikina liabwe liwelao elala.