Read lubukusu Chiny. 115 Bible Online

Chiny. 115 - lubukusu bible

Chiny. 115

¹Ee Wele Omunyali Owa Bioosi, khwiwe weng'ene, khwiwe weng'ene, ne luyali se lukhoyela lube khwifwe tawe, sikila busiime bwowo bukhawa tawe ne busuubilwa bwowo.

²Siina sikila chikholo chikhureebe efwe chili, “Wele wenywe ali waena?”

³Wele wefwe ali mwikulu, akholanga lilienya liewe.

⁴ Bifwaani biabwe biang'oonwa khukhwama khu fwesa ne sahabu, babaandu busa babing'oona.

⁵Bili ne kiminwa ne kakhali se binyala khulomaloma tawe, lundi bili ne chimoni ne kakhali se binyala khubona tawe.

⁶Bili ne kamaru, ne kakhali se binyala khuulila tawe, lundi bili ne kamoolu, ne kakhali se binyala khuunyila tawe.

⁷Bili ne kamakhono, ne kakhali se binyala khutiila tawe, lundi bili ne bikele, ne kakhali se binyala khukeenda tawe, se binyala khulomaloma tawe.

⁸Lekha bababing'oona boosi alala nende abo babieyikina, babe nga bifwaani nibio bang'oona.

⁹Enywe baandu ba Isiraeli, yeyikina Wele Omunyali Owa Bioosi. Ayeetanga ne khumuliinda enywe.

¹⁰Enywe basaayi ba Wele, yeyikina Wele Omunyali Owa Bioosi. Amuyeetanga ne khumuliinda enywe.

¹¹Enywe mweesi musaayanga Wele, yeyikina Wele Omunyali Owa Bioosi. Amuyeetanga ne khumuliinda enywe.

¹²Wele Omunyali Owa Bioosi akhukhebulila efwe lundi akhakhubiite efwe chikhabi, akhabiite chikhabi babaandu ba Isiraeli, ne basaayi ba Wele boosi.

¹³ Akhabiite chikhabi khu buli mundu omuelesia niye luyali, babenyalila alala nende bakhenyalila bosi.

¹⁴Lekha Wele Omunyali Owa Bioosi amuelesie enywe lisaaye, enywe ne babaana benywe boosi!

¹⁵Lekha Wele Omunyali Owa Bioosi amubiite enywe chikhabi, owabaang'ana likulu ne liloba!

¹⁶Likulu lili lia Wele Omunyali Owa Bioosi yeng'ene, ne kakhali aelesia omundu sibala!

¹⁷Bafu se bafumia Wele Omunyali Owa Bioosi tawe, namwe bosi bosi khwaabo bacha emakoombe[58] tawe.

¹⁸Ne kakhali, khukhafumie Wele Omunyali Owa Bioosi, khukhwama siise sino nende buli lwoosi. Fumia Wele Omunyali Owa Bioosi!