Read lubukusu Chiny. 116 Bible Online

Chiny. 116 - lubukusu bible

Chiny. 116

¹Ndi ne busiime khu Wele Omunyali Owa Bioosi, sikila auliile lisaba liase khulwe buyeeti.

²Sikila aarekeeresia lisaba liase, khwako ndimusaba niye bulamu bwase bwoosi.

³Butinyu bwe lifwa bwambotookheleele, buchuuni bwe makoombe bwandiilile, nechula buuri ne lilieembeelela.

⁴Nio nasaba Wele Omunyali Owa Bioosi ndi, “Khwekoonjelela ewe Wele Omunyali Owa Bioosi, mbonie ese!”

⁵Wele Omunyali Owa Bioosi ali owe kumwalaalo ne buluungi, Wele wefwe ali owe siisa.

⁶Wele Omunyali Owa Bioosi aliindanga bakhalimo lilieniinia tawe, nga naba mu butinyu, Wele aambonia ese.

⁷Ee mwoyo kwase ba ne siiuluukho, sikila Wele Omunyali Owa Bioosi aabeele omulayi khwiwe.

⁸Sikila Wele Omunyali Owa Bioosi amboniisie ese khukhwama mwifwa, aanjeya kamasika, ne se nakhilwa tawe.

⁹Khwako ndaba niio Wele Omunyali Owa Bioosi ali, mu sibala sie balamu.

¹⁰ Natiila lisuubila liase, akhaba ne naloma ndi, “Njuunwa lukali,”

¹¹Kamang'anyu kanjichamo mala naloma ndi, “Babaandu boosi se beyikinwa tawe.”

¹²Ndiaana siina khu Wele Omunyali Owa Bioosi, khulwe bulayi bwewe khwise.

¹³Khaane siianwa sie ndali khu Wele Omunyali Owa Bioosi, khu mupila niye orio khulwe khu khumbonia ese.

¹⁴Khamukholele niye niko nelakana koosi, mu siikhasio sie babaandu bewe boosi.

¹⁵Lifwa lio musuubilwa wo Mwami Wele Omunyali Owa Bioosi, se lili likhuwa litiiti ebweeni wewe tawe!

¹⁶Wele Omunyali Owa Bioosi, ese omukholi wowo, khukholela ewe bulayi bwene nga maayi wase yesi ne aakhukholelanga ewe. Ewe wamboniisie ese khukhwama mwifwa.

¹⁷Khukhuelesie ewe embosio eye khu khuupila orio, ne khu khusaba ewe.

¹⁸Ee khakholele Wele Omunyali Owa Bioosi nga nelakana, ebweeni we babaandu bewe boosi,

¹⁹Abuundu Atakatifu mu lukaangu lwa Wele Omunyali Owa Bioosi, akari wowo ee Yerusalemu. Fumia Wele Omunyali Owa Bioosi!