Read lubukusu Chiny. 118 Bible Online

Chiny. 118 - lubukusu bible

Chiny. 118

¹ Khe mupile Wele Omunyali Owa Bioosi orio sikila ali omulayi, lundi busiime bwewe buli bwa mindali.

²Lekha Baisiraeli balome bali, “Busiime bwewe buli bwa mindali.”

³Lekha basaayi balome bali, “Busiime bwewe buli bwa mindali.”

⁴Lekha bamusaayanga niye boosi balome bali, “Busiime bwewe buli bwa mindali.”

⁵Nasaba Wele Omunyali Owa Bioosi ne ndi mu buchuuni, anjeeta ne khu khumbelesia bulekhuule,

⁶ Wele Omunyali Owa Bioosi ne ali lubeka lwase se mba ne buuri tawe, libi siina nilio omundu anyala akholela ese?

⁷Wele Omunyali Owa Bioosi niye ounjeetanga ese, mala khabone basiku base ne bakhiliilwe.

⁸Buli bulayi khukhweyikina Wele Omunyali Owa Bioosi, khukhila babaandu busa.

⁹Buli bulayi khukhweyikina Wele Omunyali Owa Bioosi, khukhila babemeelesi baali babaandu busa.

¹⁰Basiku bakali bangara ese, ne kakhali nababunia mu bunyali bwa Wele Omunyali Owa Bioosi.

¹¹Baba bangarire chimbeka choosi, ne kakhali nababunia mu bunyali bwa Wele Omunyali Owa Bioosi.

¹²Banejebuungakho nga enjukhi, ne kakhali bawao bwangu nga kumulilo ne kwosia sichakha, mu bunyali bwa Wele Omunyali Owa Bioosi nababunia.

¹³Banjibwaakala ne burafu bukali abeele ndikho mbulwa, ne kakhali Wele Omunyali Owa Bioosi aanjeeta.

¹⁴ Wele Omunyali Owa Bioosi niye kamaani ne lilieyikina liase, niye buonia bwase.

¹⁵Rekeeresia luyoka lwe busangaafu khulwe bukhili mu maeema ke babaandu ba Wele, “Bunyali bwa Wele Omunyali Owa Bioosi nibwo bureerire bukhili.

¹⁶Bunyali bwa Wele Omunyali Owa Bioosi bwakhurereere efwe bukhili, bunyali bwa Wele Omunyali Owa Bioosi mwiie!”

¹⁷Se ndafwa tawe, ne kakhali ndamenya, mala mboole niko Wele Omunyali Owa Bioosi akholile.

¹⁸Aambukuumile lukali, ne kakhali se andekhile nafwa tawe.

¹⁹Njikulile bilibwa bie lukaangu, ningilemo mala khupile Wele Omunyali Owa Bioosi orio!

²⁰Sino nisio silibwa sia Wele Omunyali Owa Bioosi, baluungi bong'ene nibo babiriramo.

²¹Ese khufumia ewe Wele Omunyali Owa Bioosi, sikila waulila lisaba liase, sikila wambeelesie bukhili.

²² Libaale nilio baboombakhi baloba, liabeele liboofu lie mu koona.

²³Sino sili sikholwa nisio Wele Omunyali Owa Bioosi akholile, sili sie khuukia lukali mu moni chefwe!

²⁴Yino niyo endaalo niyo Wele Omunyali Owa Bioosi areereo, lekha khwekhoye ne khukisangaalila.

²⁵ Khuonie efwe Wele Omunyali Owa Bioosi, khuonie efwe! Ee Wele Omunyali Owa Bioosi, khuelesie bukhili!

²⁶ Lekha Wele abiite chikhabi khuyo owiicha mwisina lia Wele Omunyali Owa Bioosi! Efwe khukhufumia ne khuli mu lukaangu lwa Wele Omunyali Owa Bioosi.

²⁷Wele Omunyali Owa Bioosi ali Wele, abeele omulayi khwifwe. Bukula kamakheendu, rakikha naikara mala mubotookhelele alutare.

²⁸Ewe oli Wele wase, ne ese khupila ewe orio, ese ndaboola bukali bwowo.

²⁹Khupila Wele Omunyali Owa Bioosi orio sikila omulayi, lundi busiime bwewe buli bwa mindali.