Read lubukusu Chiny. 119 Bible Online

Chiny. 119 - lubukusu bible

Chiny. 119

¹Bali ne khabi abo bakhalikho ne bubi mu bulamu bwabwe tawe, abo bamenyile khuloondekhana ne lilaka lia Wele Omunyali Owa Bioosi.

²Bali basangaafu abo baloonda kamalaka kewe, abo bamuulila niye ne kumwoyo kwabwe kwoosi.

³Abo bosi bakhakholangakho kamabi tawe, ne kakhali baloondanga chingila chewe!

⁴Wele Omunyali Owa Bioosi, ewe wakhuelesie efwe kamalaka kowo, mala wakhuboolela efwe khukaloonde mu busuubilifu.

⁵Ndi ne lilieyikina likali ndi ndaba omusuubilifu, mu khuloonda kamalaka kowo!

⁶Ne ndiila kamalaka kowo koosi, se mbaambwa chisoni tawe.

⁷Nga manya bukhalaki bwowo bwe buluungi, ndakhufumia ewe ne kumwoyo kumukwalaafu.

⁸Ndaloonda kamalaka kowo, okhanjanjukhakho tawe!

⁹Omuele akhola ariena nio bulamu bwewe bwaloba khuba ne bunyaalu tawe? Akhola ario mu khuloonda likhuwa liowo.

¹⁰Ese khaka khu khukholela ewe ne kumwoyo kwase kwoosi, okhandekha nalekha khuria kamalaka kowo tawe.

¹¹Ese khebulila kamalaka kowo, nio khakhukholelakho bubwoni tawe.

¹²Ese khufumia ewe ee Wele Omunyali Owa Bioosi, njeyikie kamalaka kowo.

¹³Ndaboola ne kumumilo kwe angaaki, kamalaka niko ewe oaanile koosi.

¹⁴Ese sangaala khuloonda kamalaka kowo. Khukhila khuba ne kimiaandu kimikali.

¹⁵Neyikanga kamalaka kowo, ne khukhwinoosia kamekisia kowo.

¹⁶Sangaalilanga kamalaka kowo, se ndiibilila kamalaka kowo tawe.

¹⁷Ba omulayi khwise omukholi wowo, nio menye ne khuloonda kamekisia kowo.

¹⁸Mbelesie limanya, nio manye bung'ali bwe khuukia, buuli mwilaka liowo.

¹⁹Ndi mu sibala sino khu siise sitiiti, okhaloba khu khunjekesia kamalaka kowo tawe.

²⁰Nekoomba lukali, nenya khumanya kamalaka kowo biise bioosi.

²¹Ewe orafwiranga be liliebonia, bali ne silaamo abo bakhaloonda kamalaka kowo tawe.

²²Ndusie mu bukhomo ne khuchekheelela khwabwe, sikila naloondile kamalaka kowo.

²³Baruki bakaanana ne khukwangwaana khukhola kamabi khwise, ne kakhali ndebaasia khu malaka kowo.

²⁴Kamalaka kowo kasangaasianga, kali likeleka khwise.

²⁵Ese ndi siimbi khufwa, ngoboselie bulamu nga ne wasuubisia.

²⁶Neyama niko nakhola koosi mala ewe wanjeeta, njeyikie kamalaka kowo.

²⁷Njeete khumanya kamalaka kowo, mala ndebaasia khu malaka kowo.[59]

²⁸Ndi mu bubeeleli bukali, ndinyilisie nga ne wasuubisia.

²⁹Okhandekha naloonda chingila chimbi tawe, ne mu bulayi bwowo njeyikie kamalaka kowo.

³⁰Neyamile khuba omusuubilifu, nakhebulile kamalaka kowo.

³¹Wele Omunyali Owa Bioosi, naloondile kamalaka kowo, okhandekha naambwa chisoni tawe.

³²Ndaria kamalaka kowo lukali, sikila okhandase limanya.

³³Wele Omunyali Owa Bioosi, njeyikie sifuno sie kamalaka kowo, ne ese khakaloonde biise bioosi.

³⁴Mboolele kamalaka, mala ngaloonde, khaloonde kamalaka kowo ne kumwoyo kwase kwoosi.

³⁵Okhandekha nafuna kamalaka kowo tawe, sikila nyoolangamo busangaafu.

³⁶Mbelesie lilienya lie khuloonda kamalaka kowo, khukhila khunyoola buiinda.

³⁷Okhandekha naweselia bukesi khu biindu biikhalimo engaanga tawe, ba omulayi khwise nga ne wasuubisie.

³⁸Kholele niko wandaka ese omukholi wowo, endakaano niyo ewe okholelanga abo baria kamalaka kowo.

³⁹Mbonie khukhwama khu bukhomo bubunjiendekhelesia, kamalaka kowo kali kamalayi lukali!

⁴⁰Nikoomba khuloonda kamalaka kowo, ndase bulamu sikila ewe oli omuluungi.

⁴¹Ee Wele Omunyali Owa Bioosi, lekha busiime bwowo bukhawa tawe bunjolele, buonia bwowo bunjolele khuloondekhana ne ndakaano yowo,

⁴²nio mbe nende nilio mboolela babakhoma ese, sikila neyikina likhuwa liowo.

⁴³Njeete ndomalome bung'ali biise bioosi, sikila lilieyikina liase lili mu malaka kowo.

⁴⁴Khaloonde kamalaka kowo biise bioosi, buli lwoosi.

⁴⁵Khamenye mu bulekhuule bukali, sikila khaka khuloonda kamalaka kowo.

⁴⁶Khaboolele babaami kamalaka kowo, ne se khabe ne chisoni tawe.

⁴⁷Ese sangaalila khuloonda kamalaka kowo, sikila nakasiima.

⁴⁸Naria lundi nasiima kamalaka kowo, khenoosie kamekisia kowo.

⁴⁹Khebulila niko wasuubisia ese omukholi wowo, kambelesie ese lilieyikina.

⁵⁰Naba omuolelefu akhaba ne naba ne buchuuni, sikila lisuubisia liowo limbelesia bulamu.

⁵¹Be kibonio banjekheelela biise bioosi, ne kakhali se nalekhile khuloonda lilaka liowo tawe.

⁵²Ese khebulila bukhalaki bwowo bubwama khale, mala bumbeelesia buoleelefu ee Wele Omunyali Owa Bioosi.

⁵³Ne mbona babooni ne bakhaloonda lilaka liowo tawe, mba ne lirima likali.

⁵⁴Niimba kimienya khu malaka kowo, mu biise bibiimbi bie bulamu bwase mu sibala.

⁵⁵Wele Omunyali Owa Bioosi, siilo ese khukhebulila ewe, lundi nibaasia lilaka liowo.

⁵⁶Nyoola busangaafu bwase, mu khuloonda kamalaka kowo.

⁵⁷Ee Wele Omunyali Owa Bioosi, ewe niwe buli siindu nisio nenya, khusuubisia ndi khaloonde kamalaka kowo.

⁵⁸Khusaba ewe ne kumwoyo kwase kwoosi, ukholele siisa nga ne usuubiisie!

⁵⁹Nebaasiisie khu liba liase, mala khusuubisia ndi khaloonde kamalaka kowo.

⁶⁰Ese khola khangu, se khiinda, khuloonda kamalaka kowo tawe.

⁶¹Babooni barao kimireko khu khundiila ese, ne kakhali se nibilila lilaka liowo tawe.

⁶²Ninyokha siilo akari, khukhufumia khulwe kamalaka kowo ke buluungi.

⁶³Ese ndi omusaale owa boosi bakhuria ewe, omusaale owa boosi baria kamalaka kowo.

⁶⁴Ee Wele Omunyali Owa Bioosi, sibala siechulamo busiime bwowo bukhawa tawe, njeyikie kamalaka kowo.

⁶⁵Wele Omunyali Owa Bioosi, wakholile niko wasuubisia, lundi wabeele omulayi khwise omukholi wowo.

⁶⁶Mbelesie limanya ne bukesi, sikila ese suubila mu malaka kowo.

⁶⁷Nakholanga kamabi ne okhambukuuma tawe, ne kakhali luno ese ndoonda kamalaka kowo.

⁶⁸Ewe oli omulayi lundi owe siisa sikali! Njekisie kamalaka kowo.

⁶⁹Be ekibonio baloma ke bubeeyi khwise, ne kakhali ndoonda kamalaka kowo ne kumwoyo kwase kwoosi.

⁷⁰Babaandu bano se bali ne limanya tawe, ne kakhali ese nyoolanga busangaafu mwilaka liowo.

⁷¹Siiukuumo nisio nanyoola siaba silayi khwise, sikila siakila namanya kamalaka kowo.

⁷²Lilaka nilio wambelesia lili ne bukhala khwise, khukhila buiinda bwe mu sibala bwoosi.

⁷³Wambuumba ese lundi umbelesia buliindi, mbelesie limanya nio ndoonde kamalaka kowo.

⁷⁴Abo bakhuechanga ewe luyali balisangaala nga bakhambone ese, Sikila neyikina mwisuubisia liowo.

⁷⁵Wele Omunyali Owa Bioosi, ese manyile ndi kamalaka kowo kali ke buluungi, lundi wambukuuma ese sikila ewe omusuubilwa.

⁷⁶Lekha busiime bwowo bukhawa tawe bumboleelesie, nga ne usuubisie ese omukholi wowo.

⁷⁷Kholele ese siisa ne menye, sikila sangaalila lilaka liowo.

⁷⁸Lekha be ekibonio baambwe chisoni khulwe khuloma ke bubeeyi khwise, ne ese ndakhebulila kamalaka kowo.

⁷⁹Lekha abo bakhuria ewe beche khwise, nio bamanye kamalaka kowo.

⁸⁰Lekha ese ndobe khubakho ne bubi, khuloondekhana ne kamalaka kowo, nio khaambwa chisoni tawe.

⁸¹Wele Omunyali Owa Bioosi, kamaani kambweele, ne ndi mu khuliinda ewe usikule. Nda lilieyikina liase mwiwe.

⁸²Naluile khulwe khuliindilila niko wasuubisia ese, ne ndeeba ndi, “Okhanjeete siise siina?”

⁸³Sikila natambile bukhala nga eoochwa eyamenya mu liisi, ne kakhaba kario se nebiliile kamalaka kowo tawe.

⁸⁴Ndachiililila khuliinda khukhwola siise siina? Okhauukuume abo babakhupia siibi siise siina?

⁸⁵Babaandu be ekibonio bakhaloondanga kamalaka kowo tawe, bayabile buko ngwemo bandiile.

⁸⁶Kamalaka kowo koosi kali ka ng'ali, babaandu bakhupia ese siibi khulwe bubeeyi, njeete!

⁸⁷Bali aambi khu khunjira, ne kakhali ese se nalekhile kamalaka kowo tawe.

⁸⁸Mbonie ese khulwe busiime bwowo bukhawa tawe, nio ndoonde kamalaka kowo.

⁸⁹Wele Omunyali Owa Bioosi, lilaka liowo likhabeo buli lwoosi, lili lia mindali mwikulu.

⁹⁰Busuubilifu bwowo buliio khu selukho choosi, wakhwikhile sibala abuundu wasio, ne se sirurao tawe.

⁹¹Bibiindu bioosi biliio khukhwola endaalo yino sikila lilaka liowo, sikila bibuumbe bioosi bikhukholela ewe.

⁹²Liba bali se sangaalilanga lilaka liowo tawe, aandi nafwa khulwe buchuuni.

⁹³Se ndiibilila kamalaka kowo tawe, sikila khubirira mu niko ewe wambeelesie bulamu.

⁹⁴Ese ndi owowo, mbonie! Nabeele ne sinani mu khuloonda kamalaka kowo.

⁹⁵Babooni beenya khu khunjira ese, ne kakhali ndakhebulila kamalaka kowo.

⁹⁶Namanyile ndi buli siindu sili ne sisiakamo, ne kakhali lilaka liowo se lili ne sisiakamo tawe.

⁹⁷Nasiima lilaka liowo lukali! Khebulila lilaka liowo biise bioosi.

⁹⁸Ndoonda lilaka liowo biise bioosi, lundi lilaka liowo likila ne mba ne limanya khukhila basiku base.

⁹⁹Ndi ne limanya likali khukhila babekisia base boosi, sikila ese khebulilanga kamalaka kowo.

¹⁰⁰Ndi ne limanya khukhila basaakhulu, sikila ndoondanga kamalaka kowo.

¹⁰¹Naloba khukhola bubwoni bwosi bwosi, sikila nenya khuloonda lilaka liowo.

¹⁰²Ese se nalekhile kamalaka kowo tawe, sikila ewe wamwene niwe omwekisia wase.

¹⁰³Kamalaka kowo kali kamanulu lukali, kamanulu khukhila bubuukhi!

¹⁰⁴Ese nyoolanga limanya khukhwama mu malaka kowo, khwako nabiila bumayaanu bwoosi.

¹⁰⁵Likhuwa liowo lili etaa yase, lundi buwaanga khu ngila yase.

¹⁰⁶Ese khakhole nga nelakana ndi khaloonde kamalaka kamaluungi kowo.

¹⁰⁷Wele Omunyali Owa Bioosi, buchuuni bwase ng'ali buli bukali lukali, mbelesie bulamu khuloondekhana nga ne usuubisie.

¹⁰⁸Ee Wele Omunyali Owa Bioosi, fukiilila lisaba liase lie khu khupa orio, mala unjeyikie kamalaka kowo.

¹⁰⁹Nirekekha khutibia bulamu bwase biise bioosi,[60] Ne kakhali se nalekhile khuloonda kamalaka kowo tawe.

¹¹⁰Babooni barao kimireko khu khundiila ese, ne kakhali se nalekhile khuloonda kamalaka kowo tawe.

¹¹¹Kamalaka kowo kali kumukabwa kwa buli lwoosi, ng'ali kali ekhoyo mu mwoyo kwase.

¹¹²Neyamile khuloonda kamalaka kowo, khukhwola endaalo eye lifwa liase.

¹¹³Nabiila abo bakhali barekeerefu khwiwe tawe, ne kakhali nasiima lilaka liowo.

¹¹⁴Ewe niwe bubwilukhilo ne ngabo yase, neyikina elomo yowo.

¹¹⁵Babooni enywe, ndureo. Ese ndaloonda kamalaka ka Wele wase.

¹¹⁶Mbelesie kamaani nga ne wasuubisia mala ese menye, okhandekha nafwa kumwoyo mu lieyikina liase tawe!

¹¹⁷Ba nase, ne ese ndaba mu buliindi, khuloonde kamalaka kowo biise bioosi.

¹¹⁸Ewe oloba buli mundu okhaloonda kamalaka kowo, kamarekekha kabwe ke bubeeyi kali ka busa.

¹¹⁹Obukulanga babooni khuba nga kamaandu busa, khwako ese nasiima kamalaka kowo.

¹²⁰Nariire sikila ewe, ndi ne buuri bukali sikila bukhalaki bwowo.

¹²¹Nakholile ka ng'ali lundi kamalayi, okhanjanjukha mbe mumakhono ke bakuluumi tawe.

¹²²Suubisie oli okhayeete omukholi wowo, okhalekha babaandu be sileka bakhupia ese siibi tawe.

¹²³Naluile khulwe khulindiilila buyeeti bwowo bwe buonia, khulwe khulindiilila busikuli bwowo nibwo wasuubisia.

¹²⁴Kholele ese, omukholi wowo khuloondekhana ne busiime bukhawa tawe, mala unjeyikie kamalaka kowo.

¹²⁵Ese omukholi wowo, mbelesie limanya, nio ese manye kamalaka kowo!

¹²⁶Wele Omunyali Owa Bioosi, sino sili siise siowo khuukuuma, sikila babaandu se balikho baloonda lilaka liowo tawe.

¹²⁷Khwako ese nasiima kamalaka kowo khukhila esahabu, khukhila esahabu engwalaafu lukali.

¹²⁸Khwako ese ndoonda kamalaka kowo koosi, Nabiila bubwoni bwosi.

¹²⁹Kamekisio kowo kali ke khuukia, ngaloondanga ne kumwoyo kwase kwoosi.

¹³⁰Lilinoosia lie kamekisio kowo liaana buwaanga, lundi lireerera basilu limanya.

¹³¹Ese mbeechela, sikila nikoomba kamalaka kowo.

¹³²Ndekeeresie ukholele siisa, nga ne okholelanga abo babakhusiima ewe.

¹³³Khuloondekhana ne lisuubisia liowo, ndangirire khakwa tawe, okhalekha bubwoni bwaminya tawe.

¹³⁴Mbonie ese khukhwama khwaabo babakhupia siibi, nio ndoonde kamalaka kowo.

¹³⁵Lekha kumwalaalo kwowo kube khu mukholi wowo, mala unjeyikie kamalaka kowo.

¹³⁶Kamasika kase kachichukha nga efula, sikila babaandu bowo se baloonda kamalaka kowo tawe.

¹³⁷Wele Omunyali Owa Bioosi, ewe oli omuluungi, lundi kamalaka kowo kali ka ng'ali,

¹³⁸Kamalaka niko waana, kali kamalayi lukali lundi ka ng'ali,

¹³⁹Lirima liase lili likali, sikila basiku base se baloonda kamalaka kowo tawe.

¹⁴⁰Lisuubisia liowo lili lia ng'ali! Ese nalisiima lukali!

¹⁴¹Ese ndi omutiiti busa lundi nalekelesibwa, kakhaba kario se nibililanga kamalaka kowo tawe.

¹⁴²Buluungi bwowo bulibaao buli lwoosi, ne lilaka liowo lili lia ng'ali biise bioosi.

¹⁴³Ndi mu butinyu ne buchuuni, ne kakhali kamalaka kowo kasangaasia.

¹⁴⁴Kamalaka kowo kali ka ng'ali buli lwoosi, mbelesie ese limanya nio menye.

¹⁴⁵Ee Wele Omunyali Owa Bioosi, khusaba ewe ne kumwoyo kwase kwoosi njeete! Ese ndaloonda kamalaka kowo!

¹⁴⁶Ese khusaba ewe, mbonie mala noonde kamalaka kowo.

¹⁴⁷Ese ninyokha makhelebeende mala khusaba ewe khulwe buyeeti, neyikina likhuwa liowo.

¹⁴⁸Ngona meeso siilo sioosi, khukhwibaasia khu malaka kowo.

¹⁴⁹Ee Wele Omunyali Owa Bioosi, khulwe busiime bwowo bukhawa tawe mbulile ese, khulwe bung'ali bwowo ndiinde.

¹⁵⁰Babaandu barafu babakhupianga ese siibi balikho beecha siimbi, babaandu bakhaloondanga lilaka liowo tawe.

¹⁵¹Ee Wele Omunyali Owa Bioosi, ne kakhali ewe oli nase, ne kamalaka kowo koosi kali ka ng'ali.

¹⁵²Khukhwama khale namanya kamekisio kowo, wakakhola kabeo buli lwoosi.

¹⁵³Bona buchuuni bwase mala umbonie, sikila se nalekhile lilaka liowo tawe.

¹⁵⁴Babila kumusaango kwase mala usikule, ndase bulamu nga khuloondekhana ne lisuubisia liowo.

¹⁵⁵Babooni se balaonisibwa tawe, sikila se baloonda kamalaka kowo tawe.

¹⁵⁶Ne kakhali Wele Omunyali Owa Bioosi, siisa siowo sili sikali, kholele siisa mala umbonie!

¹⁵⁷Ndi ne basiku nende babakhupia ese siibi bakali, ne kakhali se ndekhanga khuloonda kamalaka kowo tawe.

¹⁵⁸Sinyikhwa ne mbona bataamba lisuubila, sikila se baloonda kamalaka kowo tawe.

¹⁵⁹Wele Omunyali Owa Bioosi, bona nga ne nasiima kamalaka kowo! Busiime bwowo se buwechanga tawe, khwako mbonie.

¹⁶⁰Kumusiingi kwe lilaka liowo kuli bung'ali, ne bukhalaki buluungi bwowo bwoosi buli bwa mindali.

¹⁶¹Babaandu be bunyali banjibwaakala ese khaba siene tawe, ne kakhali ese ndia lilaka liowo.

¹⁶²Ese sangaala lukali sikila kamasuubisia kowo, sangaala lukali nga oyo onyoolile sisiindu sie bukhala bukali.

¹⁶³Ese mbiilanga bubeeyi, ne kakhali siimanga lilaka liowo.

¹⁶⁴Ese khufumianga ewe kamakhabi saba buli ndaalo, khulwe bukhalaki bwowo bwe buluungi.

¹⁶⁵Abo babasiima lilaka liowo bali ne kumuleembe mu bwichufu, se siliio sinyala siabaula tawe.

¹⁶⁶Ee Wele Omunyali Owa Bioosi, ese neyikina khunyoola buonia bwowo, lundi ndoonda kamalaka kowo.

¹⁶⁷Ese ndondanga kamekisio kowo, nakasiimile ne kumwoyo kwase kwoosi.

¹⁶⁸Ese ndondanga kamalaka kowo, sikila obonanga bikholwa biase bioosi.

¹⁶⁹Wele Omunyali Owa Bioosi, lekha lisaba liase khulwe buyeeti likhwolele ewe! Mbelesie limanya nga ne wasuubisia.

¹⁷⁰Ulila lisaba liase, mala umbonie khuloondekhana ne lisuubisia liowo.

¹⁷¹Ese khakhufumie ewe biise bioosi, sikila ewe unjikisianga kamalaka kowo.

¹⁷²Kheembe lilaka liowo, sikila kamalaka kowo kali ka ng'ali.

¹⁷³Yirekekha khu khunjeeta biise bioosi, sikila ese ndondanga kamalaka kowo.

¹⁷⁴Ee Wele Omunyali Owa Bioosi, ese nikoomba lukali buyeeti bwe buonia bwowo! Ese sangaalila lilaka liowo.

¹⁷⁵Mbelesie bulamu nio nyale khu khufumia ewe, lekha kamekisia kowo kanjeete.

¹⁷⁶Njiiya nga likheese litibile, yiicha unjeete ese, omukholi wowo, sikila se nalekhile kamalaka kowo tawe.