Read lubukusu Chiny. 132 Bible Online

Chiny. 132 - lubukusu bible

Chiny. 132

¹Wele Omunyali Owa Bioosi, okhebilila Daudi, ne butinyu nibwo aabiriramo bwoosi tawe.

²Wele Omunyali Owa Bioosi, khebulila niko Daudi asuubisia, endakaano niyo aakhola khwiwe, Wele owa Yakobo omunyali owa bioosi ali,

³“Se khache munju mwase namwe ngone khu sitanda tawe,

⁴se khauluukhe namwe ngone liilo tawe,

⁵khukhwola nga ne khang'oone abuundu wa Wele Omunyali Owa Bioosi, enju eya Wele owa Yakobo omunyali owa bioosi.”

⁶ Khwaulila khuloondekhana ne Lisanduku lie ndakaano ne khuli mu Betelehemu, mala khwaliakaanila mu mikuunda kia Yearimu.

⁷Khwaloma khuli, “Lekha khuche mu nju eya Wele Omunyali Owa Bioosi, lekha khusaaye ebweeni we ndebe yewe eye bubwami.”

⁸Wele Omunyali Owa Bioosi, yiicha mu lukaangu ne Lisanduku lie ndakaano, lili simanyisio sie bunyali bwowo, mala omenye muno buli lwoosi.

⁹Lekha basaayi bowo bakhole kali ng'ali biise bioosi, lekha babaandu bowo bayokele khulwe khoyo!

¹⁰Ewe wasuubisia omukholi wowo Daudi, Wele Omunyali Owa Bioosi, okhaloba omwami omurobore wowo tawe.

¹¹ Ewe wasuubisia Daudi lukali, lisuubisia nilio okhalekha khukhola tawe oli, “Ndikhola mulala khu baana bowo basoleeli abe omwami, mala aliruka enyuma wowo.

¹²Kaaba bali babaana bowo basoleeli bali basuubilifu khu ndakaano yase, ne khu malaka niko ese mbaelesia, babaana basoleeli babwe bosi baliamiia enyuma wowo biise bioosi.”

¹³Wele Omunyali Owa Bioosi arobore lukoba lwa Sayuni, niye enya amenyemo.

¹⁴“Ano niio ndimenya buli lwoosi, ano niio nenya khuruka.

¹⁵Ee khaelesie lukoba lwa Sayuni buli siindu nisio lwenya, Ese khaelesie babanani bamwo enjikura eye siakhulia.

¹⁶Khabiite basaayi balwo chikhabi mu koosi niko bakhola, ne babaandu balwo baliimba ne khukhwikhoya lukali.

¹⁷ Muno mu bwene khakhole mulala khube lisaaye lia Daudi khuba omwami omukali, muno mu bwene khareemo buruki bwo mwami omurobore wase.

¹⁸Khaambie basiku bewe chisoni, ne kakhali bubwami bwewe bulikaliia.”