Read lubukusu Chiny. 139 Bible Online

Chiny. 139 - lubukusu bible

Chiny. 139

¹Lulwimbo lwa Daudi Wele Omunyali Owa Bioosi, ewe wamenieelesie ese mala umanyile.

²Omanyile buli siindu nisio ese kholanga, ewe niio oli omanyile kamebaasio kase koosi.

³Ewe umbonanga ese ne khola kumulimo namwe ne ndikho mbuluukha, omanyile bikholwa biase bioosi.

⁴Omanyile niko nja khuloma, akhaba ne khalomaloma tawe.

⁵Ewe wambotookhelele chimbeka choosi, uniinda nga ese khulwe kamaani kowo.

⁶Ewe umanyile ese lukali po, lino lituuma bukesi bwase.

⁷Abeele nyala nacha waena khukhwilukha ewe? Nje waena niio ewe okhali?

⁸Ne niina mwikulu, ewe olimo, ne niikha emakoombe, ewe oliyo.

⁹Nakhapurukha nabira ebukwe, namwe namenya abuundu aleeyi mumbo,

¹⁰ewe obayo khu khundangirira ese, ewe obayo khu khunjeeta ese.

¹¹Nyala naboolela sisiilima siangisa ese, namwe buwaanga bubumbotookheleele bube sisiilima,

¹²ne kakhali khwiwe akhaba sisiilima se sili simali tawe, ne siilo sili busa nga kumuusi. Khwiwe, sisiilima ne buwaanga bili bifwaanane.

¹³Ewe wabuumba kumubili kwase, ewe niwe owanda munda mwa maayi wase.

¹⁴Ese khufumia ewe sikila ese nabuumbwa mu ngila eye khuukia, bikholwa biowo bioosi bili bie khuukia. Ese manyile lino ne kumwoyo kwase kwoosi.

¹⁵Ewe wamanya khubao khwase, ese ne ndikho khula munda mwa maayi wase, ese ne ndikho khulilamo mu bwikisi.

¹⁶Ewe wambona ne khebulwa tawe. Chindaalo che bulamu bwase choosi chaandikwa mu sitabu siowo, ne chikharakikha tawe.

¹⁷Ee Wele, kamebaasio kowo kali kamatinyu lukali khwise,[65] kamebaasio kowo kali kamakali lukali!

¹⁸Kaaba bali ese ngabala, kali kamakali khukhila kumuyekhe. Ese ne siisimukha, siili busa nawe.

¹⁹Ee Wele, nenya lukali ndi ewe wire babooni! Nenya lukali ndi babaandu be sisiayuumba bakhandangana tawe!

²⁰Baloma ke bubwoni khwiwe, baloma kamabi khwiwe.

²¹Ee Wele Omunyali Owa Bioosi, ese nabiila lukali babakhubiila ewe! Naleka lukali abo baali bareengu khwiwe!

²²Nababiila ne kumwoyo kwase kwoosi, mbabukula khuba basiku base.

²³Ee Wele, menieelesie mala omanye kali mu mwoyo kwase! Ngele ese mala omanye kamebaasio kase!

²⁴Loleelesia omanye ne ndi omubi, mala undangirire mu ngila eya mindali.[66]