Read lubukusu Chiny. 140 Bible Online

Chiny. 140 - lubukusu bible

Chiny. 140

¹Lulwimbo lwa Daudi Wele Omunyali Owa Bioosi, mbonie ese khukhwama khu baandu babi, niinde khukhwama khu baandu be sisiayuumba.

²Bakwangwaana khukhola kamabi biise bioosi, bareera bulomani biise bioosi.

³ Chinimi chabwe chili chichiira nga chindemu, chilomo chabwe chili nga buchiba bwe khilakhima.

⁴Wele Omunyali Owa Bioosi, niinde khukhwama mu bunyali bwe babooni, niinde khukhwama khu baandu be sisiayuumba, bakwangwaana khu khukhupa ese asi.

⁵Babaandu be sileka barekire luriimba lundiile ese, bareereo kimireko, ne khura chindiimba khu ngila nio bandiile ese.

⁶Naboolela Wele Omunyali Owa Bioosi ndi, “Ewe oli Wele wase.” Wele Omunyali Owa Bioosi ulila khulila khwase khulwe buyeeti!

⁷Ee Wele Omunyali Owa Bioosi, Omwami wase, omuliindi wase owe kamaani, waniindile ese ne ndi mwiie.

⁸Wele Omunyali Owa Bioosi, okhaelesia babooni nisio benya tawe, okhalekha niko bakwangwaana kekholekha tawe.

⁹Okhalekha basiku base baaba bakhili tawe, khola biriikhirisio biabwe khwise bibakobolele.

¹⁰Lekha kamaanda kakesinge'ng'ile kabakwekho! Lekha bamwaatwe mu maloo, bakharuramo lundi tawe!

¹¹Abo baloma ke bubeeyi khu baandi bakhaindiaala tawe, lekha kamabi kanyoole be sisiayuumba mala kababunie.

¹²Wele Omunyali Owa Bioosi, ese namanyile ndi ewe oliindanga babanani, ne bung'ali bwe bataambi.

¹³Ng'ali baluungi bakhakhufumie ewe, balimenya niio ewe oli.