Read lubukusu Chiny. 143 Bible Online

Chiny. 143 - lubukusu bible

Chiny. 143

¹Lulwimbo lwa Daudi Wele Omunyali Owa Bioosi, ulila lisaba liase! Mu buluungi bwowo rekeeresia liliekoonjelela liase, mu busuubilwa bwowo njeete.

² Okhakhalakila ese omukholi wowo tawe, se aliio okhali ne bubi ebweeni wowo tawe.

³Omusiku wase ambaayile ese, ne khu khumbula ese lukali. Andeere mu siboe sie mu siilima mala ndi nga abo babafwa khale.

⁴Khwako kumwoyo kwambwelemo, ese ndi mu butinyu bukali.

⁵Ese khebulila chindaalo chichabira, nibaasia khu niko okholile koosi, khebulila bikholwa biowo bioosi.

⁶Khusutila kamakhono kase mwisaba, kumwoyo kwase kuli ne bulesia khwiwe nga liloba liliomu.

⁷Wele Omunyali Owa Bioosi, nono njeete! Ese natibiisie lilieyikina liase lioosi. Okhekisa khukhwama khwise tawe, namwe ndaba mwabo babeekha emakoombe.

⁸Khebusie busiime bwowo bukhawa tawe buli mutikhinyi, sikila ndechanga lilieyikina liase mwiwe. Kamasaba kase kakhwolela ewe, njekesie engila niyo nenyibwa njilekho.

⁹Wele Omunyali Owa Bioosi, ese nicha khwiwe khulwe buliindi, sikule ese khukhwama khu basiku base.

¹⁰Ewe oli Wele wase, njeyikie khukhola lilienya liowo. Ba omulayi khwise, mala undangirire khu ngila eye kumuleembe.

¹¹Wele Omunyali Owa Bioosi, sikule ese nga ne wasuubisia, mu bulayi bwowo mbonie khukhwama mu butinyu!

¹²Yiira basiku base sikila busiime bwowo khwise, mala obunie babakhupia ese siibi boosi, sikila ese ndi omukholi wowo.