Read lubukusu Chiny. 144 Bible Online

Chiny. 144 - lubukusu bible

Chiny. 144

¹Lulwimbo lwa Daudi Wele Omunyali Owa Bioosi, lulwanda lwase afume! Anjeyikianga khu khupana mwiie, ne khu khundekekha khulwe liie.

²Niye lulwanda lwase, lundi engabo yase, niye bubwilukhilo ne buonia bwase, neyikina mu niye khulwe kumuleembe. Aulanga chikholo ne khu chira asi wase.

³ Ee Wele Omunyali Owa Bioosi, omundu nisio siina nio omwinaanekho, namwe omundu busa nio ewe omukhebulile?

⁴Ali busa nga kumuuya, bulamu bwewe buli busa nga sisiiniini siwao.

⁵Ee Wele Omunyali Owa Bioosi, yikula likulu mala wikhe asi, tiila khu bikulu mala bituukhe.

⁶Burusia chimbeni mala chisalanisie basiku bowo, lasa buembo bwowo mala obatimanie.

⁷Khukhwama angaaki yinaa undusie mu lusiba lwe kameechi, mala usikule, mbonie ese khukhwama mu bunyali bwe baakwa,

⁸baakwa bakhalomanga bung'ali tawe, babea akhaba mu khwechuba.

⁹Ee Wele, ndakhwimbila ewe lulwimbo lukeni, Ndapa lituungu ne khukhwimbila ewe.

¹⁰Oelesianga babaami bukhili, ne khu sikula Daudi omukholi wowo.

¹¹Mbonie ese khukhwama khu basiku base bakuluumi, sikule ese khukhwama mu bunyali bwe baakwa, bakhalomanga bung'ali tawe, lundi babea akhaba mu khwechuba.

¹²Lekha babaana befwe basoleeli mu buele bwabwe babe nga bimelwa bie kamaani. Lekha babaana befwe bakhaana babe nga chinjeko chindayi chichatiila lichipi.

¹³Lekha bibiaki biefwe bichulemo bibiaamo buli lukano. Lekha kamakheese kefwe kali mu maayilwe, kasalane kabe kamakali lukali.

¹⁴Lekha chikhaafu chefwe chisaale chibe chingali, chikhauusia namwe chafwisia chimoosi tawe. Bililo khu ngila chefwe khulwe butinyu bikhabakhoo tawe.

¹⁵Ekholo niyo kano kaliekholekhakho eliba ne busangaafu, babaandu nibo Wele Omunyali Owa Bioosi ali Wele wabwe bali basangaafu!