Read lubukusu Chiny. 145 Bible Online

Chiny. 145 - lubukusu bible

Chiny. 145

¹Lulwimbo lwa Daudi Wele wase lundi omwami wase, ndiboola khu bukali bwowo, ndikhupila ewe orio mindali na mindali.

²Ndikhupila ewe orio buli ndaalo, ndikhufumia ewe mindali na mindali.

³Wele Omunyali Owa Bioosi ali Omukali lundi akhoyelwa afumisibwe lukali, bukali bwewe se bunyala bwamanyikhana tawe.

⁴Bikholwa biowo bilifuma khu selukho choosi, chiliboola ke bikholwa biowo bie bunyali.

⁵Chililomaloma ke luyali ne bunyali bwowo, ne ese ndibaasia khu malaka kowo ke khuukia.

⁶Babaandu balilomaloma ke bikholwa biowo bie bunyali, ne ese ndiboola ke bukali bwowo.

⁷Baliboola ke bulayi bwowo bukali, ne khukhwimba lukali khuloondekhana ne buluungi bwowo.

⁸Wele Omunyali Owa Bioosi ali owe kumwalaalo lundi ali owe siisa, ali kalaa khuambwa lirima lundi busiime bwewe bwa buli lwoosi buli bukali.

⁹Wele Omunyali Owa Bioosi ali Omulayi khu baandu boosi, ne siisa siewe sili khu bioosi nibio aakhola.

¹⁰Wele Omunyali Owa Bioosi, bibuumbe biowo bioosi bilikhufumia ewe, lundi babaandu bowo boosi balikhupila ewe orio.

¹¹Balilomaloma ke luyali lwe bubwami bwowo, ne khuboola ke bunyali bwowo,

¹²nio buli mundu alimanya bikholwa biowo bie khuukia, ne luyali lwe bunyali bwe bubwami bwowo.

¹³Buruki bwowo buli bwa mindali, ne ewe oli omwami buli lwoosi. Wele Omunyali Owa Bioosi ali omusuubilwa mu masuubisia kewe koosi, ali owe siisa mu bikholwa biewe bioosi.

¹⁴Wele Omunyali Owa Bioosi ayetanga abo baali mu butinyu, atinyilisianga abo bafwiile kimiooyo.

¹⁵Bibuumbe bioosi bikhweyikina ewe, lundi obieelesianga siakhulia mu biise bibienyekha.

¹⁶Obieelesianga siakhulia sisiolaana, wikusia lilienya liabio bioosi.

¹⁷Wele Omunyali Owa Bioosi ali omuluungi mu koosi niko akhola, ali owe siisa mu bikholwa biewe bioosi.

¹⁸Wele Omunyali Owa Bioosi ali embi khu boosi bamusaba niye, khu boosi bamusaba niye mu bung'ali.

¹⁹Akholelanga bamuria niye liliekoomba liabwe, aulilanga khulila khwabwe mala abaonia.

²⁰Wele Omunyali Owa Bioosi aliindanga bamusiima boosi, ne kakhali akhabunie babooni boosi.

²¹Ndafumia Wele Omunyali Owa Bioosi biise bioosi, lekha bibuumbe biewe bioosi bifumie lisina liewe litakatifu.