Read lubukusu Chiny. 148 Bible Online

Chiny. 148 - lubukusu bible

Chiny. 148

¹Wele Omunyali Owa Bioosi afume! Enywe mumenyile mwikulu fumisilia Wele Omunyali Owa Bioosi mwikulu.

²Enywe bamalaika bewe mweesi, mufumie niye, enywe banamae bewe be mwikulu mufumie niye.

³Enywe enyaanga ne kumwesi, mufumie niye, enywe ching'enieesi chikhosia, mufumie niye.

⁴Enywe likulu lie mwikulu, mufumie niye nende kameechi kaali angaaki we likulu, mufumie niye.[68]

⁵Lekha bioosi bifumie Wele Omunyali Owa Bioosi! Aalaka mala biabaang'anwa,

⁶biekhwiikha abuundu wabio buli lwoosi khulwe lilaka liewe, se binyala biamukholela niye sileka tawe.[69]

⁷Enywe kamanani ke mu nyanja ne chisiba chamwo choosi, fumisilia Wele Omunyali Owa Bioosi khu sibala.

⁸Enywe chimbeni ne kamaarara, ebarafu ne kamafuumbi, nende ekhuungu eye kamaani eloonda lilaka liewe mufumie niye.

⁹Enywe chingulu ne bikulu, mufumie niye, enywe kimirongooro kie kamatuunda ne kimisiru, mufumie niye,

¹⁰enywe chisaang'i choosi, chimbaya nende che mundaa, mufumie niye, enywe bibuumbe bimoola nende chinyuni, mufumie niye.

¹¹Enywe babaami ne chikholo choosi, mufumie niye, enywe babemeelesi ne baruki babaandi boosi, mufumie niye,

¹²enywe bakhaana ne basoleeli, mufumie niye, enywe bakofu ne babaana bosi, mufumie niye.

¹³Lekha boosi bafumie Wele Omunyali Owa Bioosi! Ali omukali khukhila bawele babaandi boosi, luyali lwewe lukhila sibala ne likulu.

¹⁴Aelesia babaandu bewe kamaani, nio babaandu bewe boosi bamufumie niye, babaandu ba Isiraeli, basiime bewe. Wele Omunyali Owa Bioosi afume!