Read lubukusu Chiny. 16 Bible Online

Chiny. 16 - lubukusu bible

Chiny. 16

¹Lulwimbo lwa Daudi Ee Wele, ndiinde sikila nilukhila mwiwe.

²Naboolela Wele Omunyali Owa Bioosi ndi, “Ewe Omwami wase, se ndikho ne lilayi liosi liosi tawe, ne kakhali ewe weng'ene.”

³Ne khuloondekhana ne batakatifu baali mu sibala, bali be lukoosi, ne buli busangaafu bwase khukhwikhala nabo.

⁴Abo basaaya bawele babaandi bakhabe mu bubeeleli bukali, se ndiaana embosio khu bawele abo namwe ng'amulekho kamasina kabwe tawe.

⁵Wele Omunyali Owa Bioosi, ndi naye yeng'ene, mala ambelesianga buli siindu nisio nenya, bulamu bwase buli mu makhono kewe.

⁶Wambelesie biianwa bilayi lukali, ng'ali ndi ne kumukabwa kumulayi.

⁷Fumia Wele Omunyali Owa Bioosi oungambilanga, akhaba mu silo kamebaasio kase kanjekisia limenya.

⁸ Ese manyile ndi Wele Omunyali Owa Bioosi ali ebweeni wase buli lwoosi. Ali siimbi nase, khwako se ndakhilwa tawe.

⁹Khwako ndasangaala ne kumwoyo kwase kwoosi mala mbe ne khoyo, kumubili kwase kwoosi kuuluukha mu muleembe.

¹⁰ Sikila ewe se okhandekhe emakoombe tawe, namwe se okhalekhe omusuubilwa wowo abolele mu ng'ani tawe.

¹¹Ewe unjekesia engila eye bulamu, khubao khwowo khuli ne khoyo engali, busangaafu bwa mindali buli amukhono kwowo kumuseecha.