Read lubukusu Chiny. 17 Bible Online

Chiny. 17 - lubukusu bible

Chiny. 17

¹Lisaba lia Daudi Ee Wele Omunyali Owa Bioosi, ulila khusaba khwase khulwe bung'ali, rekeeresia khulila khwase khulwe buyeeti! Ulila lisaba liase likhali lie bubeeyi tawe!

²Khalakile mu bung'ali, sikila omanyile bung'ali!

³Kaaba bali okhaka kumwoyo kwase, kaaba bali ungeniia siilo, kaaba bali ukhaka, se olanyoola mwise bumayaanu tawe. Se ndomanga ke bubwoni tawe.

⁴Khuloondekhana ne bikholwa bie babaandu, ese nariire lilaka liowo, ne se naloondile ke babaandu be sisiayuumba tawe.

⁵Naloondile chingila chowo buli lwoosi, ne senachilekhilekho tawe.

⁶Ee Wele, ese khusaba ewe sikila olangobosia, ndekeeresie mala oulile lisaba liase.

⁷Ee Omuonia wabo bayiima bubwilukhilo mwiwe khukhwama khu basiku babwe, yekesia busiime bwowo bwe khuukia bukhawa tawe.

⁸Ndiinde nga oliinda endolelo eye moni yowo, ngise mu siniini sie chindaa chowo.

⁹Ngise khukhwama khu booni babakholela sisiayuumba, khukhwama khu basiku babenya khu khunjira babambotookheleele.

¹⁰Se balikho ne siisa tawe, mala baloma ne sileka.

¹¹Basiku abo banoondakho, nono bambotookheleele, baliinda bubweyaangu bakhupe ngwe asi.

¹²Bali nga etalang'i eyerekekhe khukhwira, bali nga etalang'i eye kamaani ne yibuulila.

¹³Ee Wele Omunyali Owa Bioosi, rakikha! Khupana nabo, bebwaakale! Khulwe mbalu yowo, onia bulamu bwase khukhwama khu booni.

¹⁴Ee Wele Omunyali Owa Bioosi, khulwe bunyali bwowo, mbonie khukhwama khu basiku abo, basiku babara limenya liabwe khu bie sibala busa. Lekha banyalikhe khulwe siiukuumo nisio wabarekekhera, lekha babaana babwe banyalikhe khutuuma sikelo, lekha baramie sisiindi sibe sie babechukhulu benywe.

¹⁵Ne kakhali ese ndikhubona sikila ndi omuluungi. Ne ninyokha ndekhoya lukali khulwe khubao khwowo.