Read lubukusu Chiny. 18 Bible Online

Chiny. 18 - lubukusu bible

Chiny. 18

¹Lulwimbo lwa Daudi omukholi owa Wele Omunyali Owa Bioosi. Embela Wele Omunyali Owa Bioosi khu ndaalo niyo aamuonia khukhwama mu bunyali bwo mwami Saulo ne basiku babaandi boosi. Ee Wele Omunyali Owa Bioosi, ese nakhusiima, ewe oli kamaani kase.

²Wele Omunyali Owa Bioosi ali lulwanda lwase, niye ali lukoba lwase lwe bubwilukhilo lundi ali omusikuli wase. Wele wase, lulwanda lwase, bubwilukhilo bwase. Engabo yase, lumako lwe buonia bwase, lukoba lwase lusire.

³Fumia Wele Omunyali Owa Bioosi! Ese saba Wele Omunyali Owa Bioosi, ne ambonia khukhwama khu basiku base.

⁴Kimikoye kie lifwa kiambotookhelela, bibuli bie bubwonaki biaminya.

⁵Kimikoye kie makoombe kiangara, kimireko kie lifwa kiandiilile.

⁶Mu butinyu bwase nasaba Wele Omunyali Owa Bioosi, nalilila Wele niye sayaanga anjeete. Ne khukhwama mu Lukaangu lwewe aambulila, mala bililo biase biamwolela mu maru kewe.

⁷Nio sibala siareenga ne khukhwesisiikha, kimisiingi kie bikulu kiosi kiaterema, sikila Wele aaba ne lirima.

⁸Arusia liliisi khukhwama mu moolu kewe, afucha kumulilo kulasia khukhwama mukhanwa mwewe, ne kamaanda kakesing'eng'ile kamwamamo.

⁹Enamia likulu mala ekha asi, ne lifuumbi limali lili asi we bikele biewe.

¹⁰Aniina khu Kerubi mala apurukha, echa khangu khu ndaa che mbeo.

¹¹Akhola sisiilima siaba sisibiimbilo siewe, efuuma kamafuumbi ke fula kamasiro.

¹²Kamaarara ne chinjaso che kumulilo biaama mu lueni ebweeni wewe, mala biabirira mu mafuumbi kamamali.

¹³Wele Omunyali Owa Bioosi akukumila mwikulu nga efula, ne kumumilo kwoyo owe Angaaki Lukali kwauliilikhana.[9]

¹⁴Alasa buembo bwewe asalanisia basiku bewe, arusia chimbeni ne khubakoyaania.

¹⁵Ee Wele Omunyali Owa Bioosi, nga warafwira basiku bowo, nga wabariikhirisia ne lirima liowo, chisiba che nyanja checha chaba khwasie, kimisiingi kie sibala kiabonekha.

¹⁶Wele Omunyali Owa Bioosi enaa khukhwama angaaki mala andiila, andusia mu lusiba lwe kameechi.

¹⁷Wele Omunyali Owa Bioosi aasikula khukhwama mu bunyali bwe basiku base be kamaani, sikila baminya ese khulwe kamaani kabwe kamakali.

¹⁸Nga naba mu butinyu, bandangana, ne kakhali Wele Omunyali Owa Bioosi aniinda.

¹⁹Wele Omunyali Owa Bioosi anjeeta ne ndi mu butinyu, asikula sikila namusiimisia.

²⁰Wele Omunyali Owa Bioosi ambelesia kumuruuru khulwe buluungi bwase, ambiita chikhabi sikila se ndi ne bubi tawe.

²¹Sikila naloonda chingila cha Wele Omunyali Owa Bioosi, ne se nalekhile Wele niye sayaanga tawe.

²²Nakhola koosi khulwe lilienya liewe, ne se nafunakho kamalaka kewe tawe.

²³Se naba ne bubi ebweeni wewe tawe, neliinda, se nakhola bubwoni tawe.

²⁴Khwako Wele Omunyali Owa Bioosi ambelesie kumuruuru khulwe buluungi bwase, khulwe bulayi bwase ebweeni wewe.

²⁵Ee Wele Omunyali Owa Bioosi, ewe omusuubilwa khwaabo baali basuubilwa, ewe oli omulayi khwaabo baali balayi.

²⁶Khu baali bakwalaafu, weyekesianga khuuba omukwalaafu, ne kakhali oli omurafu khwaabo baali bamayaanu.

²⁷Sikila asikulanga abo babeboombia, ne kakhali abo babebonia ababoombia.

²⁸Ee Wele Omunyali Owa Bioosi, undeereranga buwaanga, undusiriangao sisiilima.

²⁹Nyala naula sipupu sie banamae khubirira khwiwe, nyala nasuna lisiisi lie lukoba khulwe buyeeti bwa Wele wase.

³⁰Bikholwa bia Wele wase se bilimo bubi tawe, endakaano ya Wele Omunyali Owa Bioosi eli ng'ali, ali engabo khwaabo boosi babelukhila mu niye.

³¹Naanu ooli Wele ne akhali Wele Omunyali Owa Bioosi? Naanu ooli lulwanda lwe buliindi ne akhali Wele wefwe?

³²Niye Wele yeng'ene oumbelesianga kamaani, niye okholanga engila yase neba endayi.

³³ Akhola bikele biase biangua nga bia kicheu, ne anda mu muleembe khu bikulu.

³⁴Anjekesianga khu khuupana liie, ne khufuumba buyiingo bwe kumukasa.

³⁵Ewe wambelesie engabo eye buonia bwowo, kumukhono kwowo kumuseecha kwanjeetile, khwako buyeeti bwowo bwakholile ese namanyikhaane.

³⁶Waniindile, se nareerwe mu siboe tawe, ne khaulwakho tawe.

³⁷Ndimanianga basiku base mala mbatiila, se mbalekhanga tawe khukhwola mbabunie.

³⁸Nabapa asi, ne se banyala khukhwinyokha tawe. Balambaala asi mu bikele biase.

³⁹Ewe okholanga basiku base ne bakhilwa ebweeni wase, sikila ewe umbelesianga kamaani ke khu khuupana liie.

⁴⁰Ewe okholanga basiku base banjilukha, ne abo babambiila nababunia.

⁴¹Basaba buyeeti, ne kakhali se abao obasikula tawe, balilila akhaba Wele Omunyali Owa Bioosi, ne kakhali se abakobosia tawe.

⁴²Nabatubundula baaba nga lutamuusi nilwo ekhuungu etamuusia, nabaswalakilila nga kamatosi khu ngila.

⁴³Ewe wasikula khukhwama mu siayuumba sie kholo yase, ewe wakhola naba omwimeelesi we chikholo. Chikholo nicho abeele khamanya tawe checha asi wase.

⁴⁴Nga baulilakho efuma yase, bambulila, bareende becha basikamila.

⁴⁵Bareende bafwa kimiooyo, barura mu ngoba chabwe chisire ne baterema mala becha.

⁴⁶Manyile ndi Wele Omunyali Owa Bioosi amenyile mindali, Lulwanda lwe buliindi bwase afume, elesia luyali bunyali bwa Wele ousikulanga.

⁴⁷Niye Wele ounjiyachila, oula chikholo chiili asi wase,

⁴⁸owasikula khukhwama khu basiku base, Wele angoosia khukhila basiku base, ewe wasikula khukhwama khu baandu be sisiayuumba.

⁴⁹ Ee Wele Omunyali Owa Bioosi, khakhufumie akari we chikholo sikila kano, mala niimbe khukhufumia ewe.

⁵⁰Aanaanga bukhili bukali khu mwami niye arobora, lundi ekesianga busiime bukhawa tawe khu murobore wewe, khu Daudi ne lisaaye liewe buli lwoosi.