Read lubukusu Chiny. 19 Bible Online

Chiny. 19 - lubukusu bible

Chiny. 19

¹Lulwimbo lwa Daudi Likulu liekesia luyali lwa Wele, embaka elangilila kimilimo kiewe.

²Buli ndaalo eboolela endaalo eloondakho, buli siilo siboolela siilo siloondakho.

³Khulomaloma namwe kamakhuwa se khuliio tawe, kumumilo kwabio se kuuliilikhana tawe.

⁴ Kakhaba kario niko biloma koolela sibala sioosi, ne kamakhuwa kabio koola buli abuundu mu limala lioosi. Wele ombakhamo enju eye nyanga,

⁵nayo esoa nga omuseecha ocha khuselela ne arura mu siimba yewe, nga omutimi owirekekhe khutima chimbilo.

⁶Esoela lubeka lulala lwe likulu, mala ebotookha yoola lubeka luluundi, ne se siliio sisiekisa khukhwama khu bukhafu bwayo tawe.

⁷Lilaka lia Wele Omunyali Owa Bioosi lili lilichufu, litasa bulamu mu mundu. Niko Wele Omunyali Owa Bioosi aloma kali ke khukhweyikinwa, kaana limanya khwaabo babeboombia.

⁸Kamalaka ka Wele Omunyali Owa Bioosi kali ng'ali, kasangaasia kumwoyo. Lilaka lia Wele Omunyali Owa Bioosi lili liluungi, liaana limanya.

⁹Buli bulayi khuria Wele Omunyali Owa Bioosi, khuchiililila buli lwoosi. Niko Wele Omunyali Owa Bioosi abisia kaali ka ng'ali, lundi koosi ke buluungi.

¹⁰Kalimo engaanga khukhila esahabu, kakhila akhaba esahabu endayi lukali. Lundi kamanulu khukhila bubuukhi, ne kumuketu kuli mwisasara.

¹¹Khutasa khwako ese omukholi wowo nyoolamo likaambila; khulwe khukaloonda nyoola kumuruuru kumuboofu.

¹²Ne kakhali naanu onyala amanya kamabi kewe omwene? Wele Omunyali Owa Bioosi, sikule khukhwama mu mabi kase niko khamanyile tawe!

¹³Okhandekha ese nakhola bubwoni ne manyile tawe, okhalekha bubwoni bwanduka tawe! Nio khabakho ne bubi tawe, khabakho lundi mu bwoni tawe.

¹⁴Ee Omwami Wele Omunyali Owa Bioosi, lulwanda lwase lundi omusikuli wase, Lekha kamakhuwa ke mukhanwa mwase ne kamebaasio ke mumwoyo mwase, kafukiililwe ebweeni wowo,