Read lubukusu Chiny. 21 Bible Online

Chiny. 21 - lubukusu bible

Chiny. 21

¹Lulwimbo lwa Daudi Ee Wele Omunyali Owa Bioosi, omwami wefwe ekhoya khulwe bunyali bwowo, mala asangaala lukali khulwe buyeeti bwowo!

²Ewe wamuelesie nisio enya, ne se walobile khumukholela niko asabile tawe.

³Sikila ewe wamureereere chikhabi chingali, ewe wamufwarire ekuutwa eye sahabu endayi khu murwe kwewe.

⁴Akhusaba omuelesie bulamu mala wamuelesia, limenya lileeyi lia buli lwoosi.

⁵Abeele ne lukoosi lukali khulwe buyeeti bwowo, wamuelesie efuma ne bunyali.

⁶Ewe omubiita chikhabi buli lwoosi, ewe omusangaasianga ne ekhoyo khulwe khubao khwowo.

⁷Sikila omwami wefwe eyikina Wele Omunyali Owa Bioosi, ne owe Angaaki Lukali ali ne busiime bukhawa tawe, khwako omwami se ali ne buuri tawe.

⁸Omwami alitiila basiku bewe boosi, alitiila babamubiila boosi.

⁹Ne okheeche, olibakhola babe nga kumulilo kwe sisiooso. Wele Omunyali Owa Bioosi alibabunia khulwe lirima liewe, ne kumulilo kulibosia.

¹⁰Olibunia lisaaye liabwe khukhwama khu sibala, mala babaana babwe se bakharame mu baandu tawe.

¹¹Baaba ne bakhurekekhera kamabi, aaba bali bakhuchonganila, se bakhanyale tawe.

¹²Sikila okhabatimanie, okherekekhe khubalasa ne buyiingo bwowo mu moni chabwe.

¹³Ee Wele Omunyali Owa Bioosi, eebwa luyali khulwe kamaani kowo. Khuliimba ne khufumia bunyali bwowo.