Read lubukusu Chiny. 22 Bible Online

Chiny. 22 - lubukusu bible

Chiny. 22

¹Lulwimbo lwa Daudi Wele wase, Wele wase, siina sikila ne undekhile? Siina sikila noba aleeyi nase? Walobile khukhunjeeta ne khuulila khulila khwase?

²Ee Wele wase, khulilila kumuusi ne se unjeeta tawe, akhaba siilo ndila, ne kakhali se mbuluukha tawe.

³Kakhaba kario ewe omutakatifu, Ewe wekhaale khu ndebe eye bubwami ne Baisiraeli bakhufumia.

⁴Bakuuka befwe bara lilieyikina liabwe mwiwe, bakhweyikina ewe mala wabaonia.

⁵Bakhusaba ewe, mala baonisibwa, bara lilieyikina mwiwe, mala se baambwa chisoni tawe.

⁶Ne kakhali ese se ndi omundu tawe, ndi busa nga enyeende, babaandu se bambukulamo lukeendo tawe, lundi bandekeelesia.

⁷ Boosi babambona banjekheelela, bakhomoola, ne khusisiikha kimirwe kiabwe.

⁸ Baloma bali, “Ewe weyikina Wele Omunyali Owa Bioosi, siina sikila ne akhakhuonia tawe? Kaaba bali Wele Omunyali Owa Bioosi akhusiima ewe, siina sikila ne akhakhuyeeta tawe?”

⁹Kakhaba kario niwe wandusia munda mwa maayi, niwe wareera buliindi khwise ne sinuuna.

¹⁰Nakhweyikina ewe khukhwama endaalo niyo nasaalilwakho, ne ewe obechanga Wele wase buli lwoosi.

¹¹Okhaba aleeyi nase tawe, sikila butinyu buli embi, ne se aliio onyala anjeeta tawe.

¹²Basiku bakali bambotookheleele nga chiuunwa, basiku boosi bangarire, nga chiuunwa chindafu khukhwama mu sibala sia Bashani.

¹³Basiku baasama nga chitalang'i, chiulukhuma ne chenya khundabulaka.

¹⁴Kamaani kase kambwelemo, kaweele nga kameechi kachichukhe asi ne kateenya. Bikuumba biase biafwokooye. Kumwoyo kwase kuli nga embula eyinukuluukhe.

¹⁵Kamaani kase komile nga sikoloonjo, ne lulimi lwase luanda mukhanwa khulwe bulesia, wandekhile fwiile mwipukhuulu.

¹⁶Sipupu sie babaandu babi siangarire, nga lituuli lie chimbwa bambotookheleele, bambunile[11]kamakhono ne bikele.

¹⁷Nabeele bikuumba busa. Basiku bandoleelela ne khukhukhondoola.

¹⁸ Bakabana chingubo chase, baapa chikuura khulwe khukabana chingubo chase.

¹⁹Ee Wele Omunyali Owa Bioosi, ne kakhali ewe okhaba sinao tawe! Ewe omuyeeti wase, yiicha khangu unjeete!

²⁰Mbonie khukhwama khu mbalu eye basiku base, mbonie khukhwama mu bunyali bwe chimbwa echo.

²¹Mbonie khukhwama khu mbalu eye basiku base, se nenyalila tawe[12], mbonie khukhwama khunjika che chimboongo.

²² Khaboolele babaandu base niko ewe umboolele, khakhufumisilie mu mukhung'aano kwabwe.

²³Enywe mu mwaria Wele Omunyali Owa Bioosi, mufumie! Muelesie luyali enywe lwibulo lwa Yakobo lwoosi, mala mumwinamile enywe lwibulo lwa Isiraeli lwoosi!

²⁴Sikila se aloba khubukula lukeendo namwe alekelesia butinyu bwo oyo ooli mu butinyu tawe, lundi se amulekhilekho tawe, ne kakhali oli mu butinyu ne amusaba aulila.

²⁵Ewe unyalila ese ne khufumisilia mu mukhung'aano kumuboofu kwe babaandu, koosi niko nelakana khukholele ewe khakakhole ebweeni wabo bakhusaayanga ewe.

²⁶Babanani balilia mala bekure, abo babeecha khu Wele Omunyali Owa Bioosi balimufumia! Lekha mube balamu buli lwoosi.

²⁷Chikholo che mu sibala choosi chilikhebulila Wele Omunyali Owa Bioosi mala chimukobolele. Chikholo mu bibala bioosi chilimusaaya.

²⁸Sikila bunyali buli bwa Wele Omunyali Owa Bioosi, mala aruka chikholo.

²⁹Ng'ali be sileka mu sibala boosi balimwinamila[13], babaandu baakhafwe boosi balimwinamila, nende oyo okhanyala aliinda bulamu bwewe omwene tawe.

³⁰Chiselukho che chindaalo chichiicha chilimukholela, babaandu baliboolela eselukho eyiicha ko mwami,

³¹mala balaangilila buonia bwewe khu baandu bakhasaalwa tawe, bali Wele Omunyali Owa Bioosi niye owakakhola.