Read lubukusu Chiny. 27 Bible Online

Chiny. 27 - lubukusu bible

Chiny. 27

¹Lulwimbo lwa Daudi Wele Omunyali Owa Bioosi ali buwaanga bwase lundi omuonia wase, ndaria naanu? Wele Omunyali Owa Bioosi ali omuliindi wase, ndaba ne buuri khu naanu?

²Babooni ne banjibwaakala, ne khuloma kamabi khwise, babaandu ba bambiila ne basiku base abo baliituya mala bakwe.

³Banamae bakhangara, se ndaba ne buuri tawe, basiku bakhenyosia sisiayuumba khwise, se ndalekha khuba ne lilieyikina tawe.[16]

⁴Nasabile Wele Omunyali Owa Bioosi siindu silala siong'ene, nenya esio siong'ene, ndi, mu bulamu bwase bwoosi, menye munju eya Wele Omunyali Owa Bioosi, nikhoye khulwe bulayi bwa Wele Omunyali Owa Bioosi, ne khumusaayila mu Lukaangu lwewe.

⁵Sikila mu biise bie butinyu, akhangise munju yewe, akhangise mwieema liewe, akhande abuundu ebuliindi khu lwanda.

⁶Khwako ndiula basiku babambotookheleele. Ndiaana chimbosio mu Lukaangu lwewe, ne khukhwikhoya lukali. Ndimba ne khufumia Wele Omunyali Owa Bioosi.

⁷Ee Wele Omunyali Owa Bioosi, ne khulilila lukali mbulile, kholele siisa mala unjeete!

⁸Nga waloma oli,[17] “Yiicha usaaye,” nakobosia ndi, “Wele Omunyali Owa Bioosi, ndikho nicha.”

⁹Okhekisa nio ese khilwe khukhubona tawe! Okhaba omukhalafu khwise tawe, okhaoona omukholi wowo tawe. Ewe obeechanga buyeeti bwase. Ee Wele omuonia wase, Okhandekha tawe, okhanjanjukha tawe.

¹⁰Sikila paapa ne maayi banyala banjanjukha, ne kakhali Wele Omunyali Owa Bioosi aliniinda.

¹¹Wele Omunyali Owa Bioosi, njeyikie niko wenya khole, mala undangirire khu ngila endayi, sikila ndi ne basiku bakali.

¹²Okhanjanjukha ebweeni we basiku base tawe, banjibwaakala mu khuloma bubeeyi khwise ne khukhundikhirisia.

¹³Suubila ndi ndibona bulayi bwa Wele Omunyali Owa Bioosi, ne siili mu sibala sie bulamu.

¹⁴Yeyikina Wele Omunyali Owa Bioosi. Ba ne lisuubila, okhafwa kumwoyo tawe. Yeyikina Wele Omunyali Owa Bioosi.