Read lubukusu Chiny. 28 Bible Online

Chiny. 28 - lubukusu bible

Chiny. 28

¹Lulwimbo lwa Daudi Ee Wele Omunyali Owa Bioosi, lulwanda lwe buliindi bwase, ese khusaba ewe. Ulila khulila khwase! Kaaba bali se unjeeta tawe, ndaba mulala khwaabo bafwa.

²Ulila lisaba liase, nga ne khulilila unjeete, nga suta kamakhono kase, ebweeni we Lukaangu lwowo lutakatifu.

³Okhakhalakila alala ne babooni tawe, alala ne naabo bakhola ke bubwoni tawe, babaandu baaloma ke busaale, ne kakhali babeene bali ne likhendekha likali mu miooyo kiabwe.

⁴ Baukuume khulwe bikholwa biabwe, sikila bubwoni nibwo bakholile. Baukuume khulwe bikholwa biabwe bioosi, bakholele niko bakhoyelwa bakholelwe!

⁵Se babukula lukeendo mu bikholwa bia Wele Omunyali Owa Bioosi, namwe mu biindu nibio aakhola tawe. Khwako Wele Omunyali Owa Bioosi alibaukuuma mala ababunie buli lwoosi.

⁶Wele Omunyali Owa Bioosi afume! Sikila auliile lisaba liase.

⁷Wele Omunyali Owa Bioosi niye kamaani kase ne ngabo yase, lilieyikina liase lili mu niye. Khwako nyoola buyeeti mala nekhoya, mala mwimbila khumufumia.

⁸Wele Omunyali Owa Bioosi niye kamaani ke babaandu bewe, ali bubwilukhilo bwe buonia khu barobore bewe.

⁹Wele Omunyali Owa Bioosi, onia babaandu bowo, mala obiite chikhabi khwaabo baali babowo. Ba omwaayi wabwe, mala obaliinde buli lwoosi.