Read lubukusu Chiny. 29 Bible Online

Chiny. 29 - lubukusu bible

Chiny. 29

¹Lulwimbo lwa Daudi Bibuumbe bie mwikulu, fumia Wele Omunyali Owa Bioosi, fumia luyali ne bunyali bwewe.

²Fumia lisina lie luyali lia Wele Omunyali Owa Bioosi, saaya Wele Omunyali Owa Bioosi ne muli Abuundu Atakatifu.

³Kumumilo kwa Wele Omunyali Owa Bioosi kuuliilikha khu nyanja, Wele owe luyali atulukha, ne kumumilo kwewe kukeenda khu nyanja.

⁴Kumumilo kwa Wele Omunyali Owa Bioosi kuli kwe bunyali, kumumilo kwa Wele Omunyali Owa Bioosi kwechuule luyali.

⁵Kumumilo kwa Wele Omunyali Owa Bioosi kufunanga kimitarakwa, Wele Omunyali Owa Bioosi afunanga kimitarakwa kia Lebanoni.

⁶Akholanga bikulu bia Lebanoni bisuniakila nga chimoosi, lundi akholanga sikulu sia Hamoni ne sieliiya nga emboongo eng'ana.

⁷Kumumilo kwa Wele Omunyali Owa Bioosi kurusia chinjaso che kumulilo.

⁸Kumumilo kwa Wele Omunyali Owa Bioosi kureengia sichiimi, Wele Omunyali Owa Bioosi areengia sichiimi sia Kadeshi.

⁹Kumumilo kwa Wele Omunyali Owa Bioosi kukholanga kimiruumba ne kiekoyamo, ne khuchura kamasaafu ke kimirongooro, ne buli mundu mu Lukaangu lwa Wele Omunyali Owa Bioosi ayokela ali, “Luyali lube khu Wele.”

¹⁰Wele Omunyali Owa Bioosi aruka akhaba chinyanja, aruka nga Omwami buli lwoosi.

¹¹Lekha Wele Omunyali Owa Bioosi atase babaandu bewe kamaani! Lekha Wele Omunyali Owa Bioosi abiite babaandu bewe chikhabi che kumuleembe!