Read lubukusu Chiny. 31 Bible Online

Chiny. 31 - lubukusu bible

Chiny. 31

¹Lulwimbo lwa Daudi Ee Wele Omunyali Owa Bioosi, ne lukhiile mwiwe, okhandekha naambwa chisoni tawe, mu buluungi bwowo sikule!

²Reka liiru liowo umbulile; sikule bwangu! Ba lulwanda lwe bubwilukhilo bwase, ne lukoba lwase lwe bubwilukhilo khulwe khukhumbonia.

³Ewe ng'ali oli lulwanda lwase ne lukoba lwase lwe bubwilukhilo, ndangirire mala unjimeelele nga ne wasuubisia.

⁴Okhalekha nakwa mu luriimba nilwo bandekire tawe, sikila ewe oli bubwilukhilo bwase.

⁵ Ee Wele Omunyali Owa Bioosi, Wele omusuubilwa, ewe wasikuule ese, nareere bulamu bwase mu makhono kowo.

⁶Ewe wabiila abo basaaya bifwaani busa, ne kakhali ese neyikina Wele Omunyali Owa Bioosi.

⁷Ndiekhoya ne khusangaala khulwe busiime bwowo bukhawa tawe, sikila ewe waboone buchuuni bwase, ewe wamanyile busiku bwase,

⁸ne se wandekhile mu makhono ko musiku tawe, ewe wambeelesie bulekhuule.

⁹Ee Wele Omunyali Owa Bioosi, njalaale sikila ndi mu butinyu, chimoni chase chaluiliile khulwe khulila, ne samwene naweele kamaani.

¹⁰Bulamu bwase buli bwe sibeela, ne kimiiko kiase mu khusiikhiikha, kamaani kase kawele sikila buchuuni,[19] ne bikuumba biase biafwokoye.

¹¹Basiku base boosi bandekeelesia, sienya meno khu bachirani base, sirikhirisio khu baandu babamanyile, abo babambona khu ngila banjilukha.

¹²Buli mundu anjibiliile nga owafwa, nabeele nga enyuungu eyatikha.

¹³Mbulila basiku base ne bemoonya, biriisio biangarire. Balikho barekekha kamabi khwise, bakwangwaana khukhunjira.

¹⁴Ee Wele Omunyali Owa Bioosi, ne kakhali lilieyikina liase lili mwiwe, ndoma ndi, “Ewe Wele wase.”

¹⁵Bulamu bwase buli mu makhono kowo, sikule khukhwama mu makhono ke basiku base, ne naabo babakhupia siibi.

¹⁶Lekha kumwalaalo kwowo kube khu mukholi wowo, mbonie khulwe busiime bwowo bukhawa tawe!

¹⁷Ee Wele Omunyali Owa Bioosi, okhandekha naambwa chisoni tawe, sikila khusaba ewe, lekha babooni baambwe chisoni, lekha beekhe emakoombe ne basilile nga bamiinyi.

¹⁸Lekha babeeyi baande chinimi chabwe, baloma kamabi khu baluungi mu khwebonia ne sileka.

¹⁹Bibiindu nibio wabikhila abo babakhuria bili bilayi biriena! Buli mundu omanyile bulayi bwowo, bamanyile nga okholelanga bulayi abo bakhweyikina ewe ebweni we babaanabe babaandu.

²⁰Obakisa abuundu we kumuleembe niio oli, obakisa munju eye kumuleembe khukhwama khu kwangwaani che babaandu, ewe obaelesia kumuleembe asi we buliindi bwowo, khukhwama khu bukhomo bwe basiku babwe.

²¹Wele Omunyali Owa Bioosi afume! Sikila mu ngila eye khuukia ekesie khwise busiime bwewe bukhawa tawe. Nga nakarwa oli lukoba lubotookhelesie,

²²nareenga mala nakanakana ndi andimanie khukhwama mu moni chewe. Ne kakhali aulila khulila khwase, nga namusaba anjeete.

²³Enywe basuubilwa ba Wele Omunyali Owa Bioosi mweesi siima Wele Omunyali Owa Bioosi. Wele Omunyali Owa Bioosi aliinda basuubilwa, ne kakhali aukuuma babebonia nga bakhoyelwa.

²⁴Mutinya mala munyindaale, enywe mweesi mu mweyikina Wele Omunyali Owa Bioosi.