Read lubukusu Chiny. 32 Bible Online

Chiny. 32 - lubukusu bible

Chiny. 32

¹Lulwimbo lwa Daudi Abiitwa chikhabi oyo niye bubwoni bwewe bubeelwa, niye bubi bwewe burusibwao.

²Omundu niye Wele Omunyali Owa Bioosi akhabonamo bubi tawe, lundi okhalimo sipoli tawe, aabiitwa chikhabi.

³Kamaani kambwamo khulwe khulila endaalo yoosi, nga ne khekanila bubwoni bwase tawe.

⁴Wele Omunyali Owa Bioosi, ewe wambukuuma siilo ne kumuusi, kamaani kambwamo sio, nga luume mu bukhafu bwe siimiyu.

⁵Nakhwiyamila bubwoni bwase, ne se nakisa bubi bwase tawe. Naloma ndi, “Ndekanila kamabi kase khu Wele Omunyali Owa Bioosi,” mala ewe wambeela busiro bwe bubwoni bwase.

⁶Khwako lekha buli mundu owasuubila Wele, aane lisaba khwiwe mu biise bie butinyu, butinyu[20] bwakhaba bukali nga kumukhula, se bulimwolakho tawe.

⁷Niwe bubwikiso bwase, okhandusie mu butinyu. Niimba lukali khulwe buonia bwowo, sikila uniindanga.

⁸Wele Omunyali Owa Bioosi aloma ali, “Khakhwekesie engila niyo okhoyele oloonde, khakhweyikie mala khukaambile.

⁹Okhaba nga efarasi namwe enyumbu tawe, se chiulilanga tawe nicho baramo kimikoye nio bachikeesia, busa se chiicha niio benya tawe.”

¹⁰Babooni baliba mu buchuuni bukali, ne kakhali busiime bukhawa tawe bubotookhelela abo basuubila Wele Omunyali Owa Bioosi.

¹¹Baluungi enywe, sangaala ne khukhwekhoya, sikila niko Wele Omunyali Owa Bioosi akholile. Enywe mu mwamuria, yokela khulwe khoyo!