Read lubukusu Chiny. 34 Bible Online

Chiny. 34 - lubukusu bible

Chiny. 34

¹Lulwimbo lwa Daudi, nga aaba ne Abimeleki ekhola khuba omulalu mala Abimeleki amuoona Ndafumia Wele Omunyali Owa Bioosi buli lwoosi, se ndilekha khumufumia tawe.

²Ndamufumia sikila niko akholile, lekha babapisibwa siibi baulile mala basangaale.

³Langilila luyali lwa Wele Omunyali Owa Bioosi, Wele wase, lekha fweesi alala khumufumie.

⁴Nasaba Wele Omunyali Owa Bioosi mala anjeeta, andusiamo buuri bwase bwoosi.

⁵Babapisibwa siibi bamweyikina mala basangaala, se balinyoolakho chisoni tawe.

⁶Omundu omubanani yuno alila, mala Wele Omunyali Owa Bioosi amuulila, ne khumusikula khukhwama mu butinyu bwewe bwoosi.

⁷Malaika owa Wele Omunyali Owa Bioosi emelanga abo babaria Wele Omunyali Owa Bioosi, lundi abasikulanga.

⁸ Chanjama mala mubone muli Wele Omunyali Owa Bioosi ali omulayi! Omundu owelukhila mu Wele Omunyali Owa Bioosi ali ne busangaafu!

⁹Enywe babaandu ba Wele, ria Wele Omunyali Owa Bioosi, sikila abo bamuria se bataamba siindu tawe.

¹⁰Akhaba chitalang'i ching'ana chionga enjala khulwe khutaamba siakhulia, ne kakhali abo baria Wele Omunyali Owa Bioosi, se bataamba sisiindu silayi siosi siosi tawe.

¹¹Basaale base mu siili baraaka, yiicha, mala murekeeresie kakaase, lundi ndabeyikia khuba ne liria khu Wele Omunyali Owa Bioosi.

¹² Mwenya khukhwikhoyela limenya? Mwenya limenya lileeyi ne busangaafu?

¹³Khwako okhaloma ke bubwoni ne bubeeyi tawe.

¹⁴Lekha bubwoni mala okhole kamalayi, ba ne sinani sie khureera kumuleembe ne kumwoyo kwowo kwoosi.

¹⁵Wele Omunyali Owa Bioosi aliindanga baluungi, lundi aulilanga lisaba liabwe,

¹⁶ne kakhali se enyanga bakholanga bubwoni tawe, nio mbo ne bafwa, bebililwa khangu.

¹⁷Wele Omunyali Owa Bioosi aulilanga baluundi ne basaba buyeeti, mala abasikula khukhwama mu butinyu bwabwe bwoosi.

¹⁸Wele Omunyali Owa Bioosi ali siimbi khwaabo bafwiile kimiooyo, asikulanga abo bakhalikho nende nisio beyikina tawe.

¹⁹Omuluungi ali ne butinyu bukali, ne kakhali Wele Omunyali Owa Bioosi amusikula khukhwama mu butinyu obwo bwoosi,

²⁰ Wele Omunyali Owa Bioosi amuliindanga lukali, se afunikhakho akhaba sikuumba silala tawe.

²¹Bubwoni buliira babooni, ne bababiila baluungi balinyoola siiukuumo.

²²Wele Omunyali Owa Bioosi aonianga bulamu bwe bakholi bewe, yesi yesi owilukhila mu Wele Omunyali Owa Bioosi se aliukuumwa tawe.