Read lubukusu Chiny. 35 Bible Online

Chiny. 35 - lubukusu bible

Chiny. 35

¹Lulwimbo lwa Daudi Ee Wele Omunyali Owa Bioosi, khiingilila abo babakhiingilila, mala okhupe abo bakhupana nase!

²Bukula engabo yowo ne sitechelo, mala wiche unjeete.

³Rekekha lifumo ne lisaakha khwaabo babaandimania. Mboolele oli, “Ese ndaba buonia bwowo!”

⁴Lekha abo babenya khunjira baambwe chisoni, ne khuchangalaasibwa! Lekha abo babandekekhela kamabi baulwe ne khuambwa chisoni.

⁵Lekha babe nga likhuuchi litamuusibwa mu mbeo, Malaika owa Wele Omunyali Owa Bioosi ne abatimania!

⁶Lekha engila yabwe ebeekho sisiilima ne bumiumiu, malaika owa Wele Omunyali Owa Bioosi ne abatimania.

⁷Bareka ese ne luriimba, ne se baba ne sifuno tawe, mala bayaba buuko buleeyi nio bandiililemo.

⁸Ne kakhali libuna lilabatundubikha, balakwa mu luriimba lwabwe babeene, mala bakwe babune.

⁹Khwako khekhoye mu Wele Omunyali Owa Bioosi, ne khumufumia khulwe buonia bwewe.

¹⁰Khaboolele Wele Omunyali Owa Bioosi ne kumwoyo kwase kwoosi ndi, “Se aliio oli nga ewe tawe, ewe oliindanga batofu khukhwama khu be kamaani, babanani khukhwama khu banuuli.”

¹¹Babaandu babi baloma kamabi khwise, lundi bandaakho busa kamabi niko khamanyile tawe.

¹²Mbakholela kamalayi nabo bakholela kamabi mala ndi mu ngunyi.

¹³Ne kakhali nga balwaala, nefwara kamakunia, neelesia samwene buchuuni mu khuonga enjala. Nasaba ne ninamiliile,

¹⁴nga ofwisiisie omusaale namwe wandaayase, nakeenda nga ofwisiisie maawe, ne neunamile ne sibeela.

¹⁵Ne kakhali nga naba mu butinyu, boosi basangaala mala becha alala nio banjekheelele. Babaandu nibo khamanya tawe bakhupa ne se balekhakho khukhupa tawe.

¹⁶Nga babaandu bachekheelela baleme, bakhondoola.

¹⁷Ee Wele Omunyali Owa Bioosi, olaloleelela busa khukhwola siise siina? Sikule khukhwama mu makhono kabwe, mbonie khukhwama khu talang'i chino!

¹⁸Nio khupile orio mu mukhuung'ano kwe babaandu bowo, khakhufumie ebweeni wabwe boosi.

¹⁹ Okhalekha basiku base babeeyi abo, bekhoya khulwe khukhilwa khwase tawe. Okhalekha babaambiila busa abo bamuunamuuna khulwe bubeeleli bwase tawe.

²⁰Sikila se beenya kumuleembe tawe, ne kakhali barekekhera babaandu be kumuleembe mu sibala kamakhuwa ke bubeeyi.

²¹Banjokelela ne bandoma bali, “Khwabona niko wakhola!”

²²Ee Wele Omunyali Owa Bioosi, ne kakhali ewe waboone kano, khwako omwami, okhasila busa tawe, okhaba sinaao tawe!

²³Ee Omwami, yinyokha wiche mala unjeete, Wele wase, yinyokha mala ukhupanile.

²⁴Ee Wele Omunyali Owa Bioosi, Wele wase, khulwe buluungi bwowo, bisia oli ese se ndikho ne bubi tawe, lundi okhalekha basiku base bekhoya sikila ese tawe.

²⁵Okhalekha baboolanila bali, “Khwamunyalile! Elio nilio khwenyile busa” tawe!

²⁶Lekha abo babekhoya khulwe butinyu bwase baambwe chisoni alala ne khukoyaana! Lekha abo babeniinia khwise baambwe chisoni chingali ne khuchangalaasibwa!

²⁷Ne kakhali lekha abo babeenya khubona bali se ndi ne bubi tawe, bayokele khulwe khoyo mala balome buli lwoosi bali, “Wele Omunyali Owa Bioosi Omukali asiimisibwa ne buoleelefu bwo mukholi wewe!”

²⁸Nio ndilaangilila buluungi bwowo, mala khufumie endaalo yoosi.