Read lubukusu Chiny. 36 Bible Online

Chiny. 36 - lubukusu bible

Chiny. 36

¹Lulwimbo lwa Daudi omukholi owa Wele Omunyali Owa Bioosi Bubwoni bulomaloma ne omwoni mu mwoyo kwewe, se enya Wele tawe lundi se amuria tawe.

²Sikila ebea omwene ali, bubwoni bwewe se bunyala bwamanyikha mala bwabiilwa tawe.

³Ali ne lilomaloma libi ne bubeeyi bukali, alekhile khukhola kamakhuwa sikesi ne khukhola kamalayi.

⁴Ne akonile khu sitanda siewe arekekha ke bubwoni, erekekha mu ngila ekhali endayi tawe, ne se alekhangakho bubwoni tawe.

⁵Ee Wele Omunyali Owa Bioosi, busiime bwowo bukhawa tawe bwoola mwikulu, busuubilifu bwoola mu maleesi.

⁶Buluungi bwowo buli nga bikulu bileeyi, bukhalaki bwowo buli nga chisiba che nyanja, Ee Wele Omunyali Owa Bioosi, ewe oliindanga babaandu ne chisaang'i.

⁷Ee Wele, busiime bwowo bukhawa tawe buli bulayi po! Babaandu belukhilanga mu siniini sie chindaa chowo.

⁸Bakhola enaikara khu biakhulia bikali bie munju mwowo, lundi obaelesianga kameechi ke khunywa khukhwama mu luuchi lwe bulayi bwowo.

⁹Sikila ewe oli sinoko sie bulamu, ne khulwe buwaanga bwowo khubona buwaanga.

¹⁰Chiililila khusiima abo babakhumanya ewe, ne khukholela baluungi kamalayi.

¹¹Okhalekha babaandu be kileki banjibwaakala, namwe babooni bandimania tawe.

¹²Lola niio babooni bakwile. Lola balambaalile, se banyala khwinyokha tawe.