Read lubukusu Chiny. 37 Bible Online

Chiny. 37 - lubukusu bible

Chiny. 37

¹Lulwimbo lwa Daudi Okheendekhelela khulwe babooni tawe, okhabubila bakhola kamabi tawe,

²sikila baliwao nga bunyaasi, mala boome nga bimelwa.

³Yeyikina Wele Omunyali Owa Bioosi, ne khukhola kamalayi, khwako olimenya mu sibala ne khuba ne kumuleembe.

⁴Sangaala mu Wele Omunyali Owa Bioosi, yeyikina Wele Omunyali Owa Bioosi, mala alikhuyeeta ewe.

⁵Yiaana khu Wele Omunyali Owa Bioosi, yeyikina Wele Omunyali Owa Bioosi, mala alikhuyeeta ewe,

⁶alikhola buluungi bwowo bukhosie nga enyanga eye mwiaangilwe.

⁷Lindiilila buyeeti bwa Wele Omunyali Owa Bioosi mu liekhaliilikha, baindiaala namwe nibo kamarekekha kabwe kekholekha bulayi bakhakila weendekhelela tawe.

⁸Okheendekhelela namwe waba ne lirima tawe, bikhureerera bubwoni busa.

⁹Sikila babooni balibuna, ne kakhali babeyikina Wele Omunyali Owa Bioosi balinyoola kamaloba.

¹⁰Siasikaale siise sitiiti siri ne babooni bawao, wakhabayiima, se olibanyoola tawe.

¹¹ Ne kakhali babeeboombia balinyoola sibala, mala bekhoye mu bunyindaafu ne kumuleembe.

¹²Omwoni arekekhera omuluungi kamabi, mala amukhondoola khulwe khumubiila.

¹³Ne kakhali Wele Omunyali Owa Bioosi amuchekha, sikila amanyile ali libuna lio mwoni lili siimbi.

¹⁴Babooni babanula chimbalu chabwe, ne khurekekha buyiingo bwabwe khukhwira babanani ne bataambi, khusiinja abo bakholanga ka ng'ali,

¹⁵ne kakhali baleerwa ne chimbalu chabwe babeene, ne buyiingo bwabwe bulafuniakakwa.

¹⁶Sitiiti nisio omuluungi ali nasio, sikhila buiinda bwe babooni bakali.

¹⁷Sikila Wele Omunyali Owa Bioosi alirusiao bunyali bwe babooni, ne kakhali aliliinda abo baali balayi.

¹⁸Wele Omunyali Owa Bioosi aliindanga abo bamuulila niye, ne sibala siliba sisiabwe buli lwoosi.

¹⁹Se baambwa chisoni mu bise biibi tawe, mu ndaalo che enjala baliba ne bikali.

²⁰Ne kakhali babooni balibuna, basiku ba Wele Omunyali Owa Bioosi bali nga lukoosi lwe bimuli, biwao, biwao nga liliisi.

²¹Omwoni ekopa ne se aruunga tawe, ne kakhali omuluungi ali omuaani,

²²sikila abo nibo Wele Omunyali Owa Bioosi abiita chikhabi balinyoola sibala, ne kakhali nibo Wele Omunyali Owa Bioosi alaama balibuna.

²³Wele Omunyali Owa Bioosi arangiriranga omundu, khu ngila niyo omundu akhoyeele aloonde, ne khuliinda abo bamusiimisia.

²⁴Baakhakwa, se baakama asi tawe, sikila Wele Omunyali Owa Bioosi alibenyosia.

²⁵Naba omuraaka ne luno nabeele omusaakhulu, mala khabonakho omuluungi ne anjukhwa, namwe babaana babwe ne basaba siakhulia tawe.

²⁶Buli lwoosi aananga mu bulekhuule ne khukhwekopia khu baandi, ne khu niye babaana bewe bali ekhabi,

²⁷lekha bubwoni mala okhole kamalayi, nio omenye buli lwoosi.

²⁸Sikila Wele Omunyali Owa Bioosi asiima bung'ali, se alianjukha basuubilwa bewe tawe. Baluungi baliliindwa buli lwoosi, ne kakhali lisaaye lie babooni lilibuna.

²⁹Baluungi balinyoola sibala, mala bamenyemo buli lwoosi.

³⁰Omundu omuluungi aloma ke limanya, lundi aloma mu bung'ali.

³¹Atiila lilaka lia Wele wewe mu mwoyo kwewe, ne se alilekhakho tawe.

³²Omwoni ekhiina omuluungi, mala akhaka khumwiira.

³³Ne kakhali Wele Omunyali Owa Bioosi se alilekha omuluungi mu bunyali bwo musiku wewe, namwe amulekhe ne akhalakilwa abiiywe tawe.

³⁴Yeyikina Wele Omunyali Owa Bioosi ne khuloonda kamalaka kewe, ne alikhukoosia ewe akhuelesie sibala.

³⁵Nabona omwoni omukuluumi lukali, eniinia khu baandu boosi nga kumutarakwa kwa Lebanoni,

³⁶ne kakhali nakelao nabirao ne se abao tawe, namuyiima, ne kakhali se anyoolekha tawe.

³⁷Manyiilila omundu okhali ne bubi tawe, ne khulola omuluungi, sikila omundu owe kumuleembe aba ne lisaaye,

³⁸ne kakhali babooni boosi balibuna, ne lisaaye liabwe lilibuna.

³⁹Buonia bwe baluungi bwama khu Wele Omunyali Owa Bioosi, niye bubwilukhilo bwabwe mu biise bie butinyu.

⁴⁰Wele Omunyali Owa Bioosi abayeetanga ne khu basikula, abasikulanga khukhwama mu makhono ke babooni ne khubaonia, sikila belukhila mu niye.