Read lubukusu Chiny. 38 Bible Online

Chiny. 38 - lubukusu bible

Chiny. 38

¹Lulwimbo lwa Daudi lwe siianwa sie likhebulila Ee Wele Omunyali Owa Bioosi ne oli ne lirima okhandafwira tawe, namwe mubukhalafu bwowo wambukuuma tawe.

²Sikila wambumiisie ne buembo bwowo, lundi ewe wakhupile nakwiile.

³Ndi mu buchuuni bukali sikila lirima liowo, kumubili kwase kwoosi kulwaala sikila bubwoni bwase.

⁴Sikila bubwoni bwase buli bukali khutuuma sikelo, bubwoni bwase buli busiro bukali khwise.

⁵Kamakoonjo kaase kaunya lundi kabola, sikila busilu bwase.

⁶Ninamilila ne khulambaala sikila buchuuni, ndila endaalo yoosi.

⁷Sikila kumubili kwase kwabilile, ne se kuli ne bulamu tawe.

⁸Natekheele ne khulambaala, ndila sikila naanisibwa mu mwoyo kwase.

⁹Ee Omwami, ewe omanyile niko nekoomba, oulilanga khusikhiikha khwase.

¹⁰Kumwoyo kwase kupa, kamaani kambweele, ne chimoni chase chosi chatofule.

¹¹Basaale ne bachirani base se beecha embi nase tawe, sikila kamakoonjo kase, akhaba balebe base banjibebeeile.

¹²Abo babenya khunjira barekekha chindiimba chabwe, abo babenya mbe mu buchuuni baloma ke libuna, ne khukhunganakanila kamabi buli lwoosi.

¹³Ne kakhali ndi nga omumiinyi se mbulila tawe, nga owaanda lulimi okhang'amulanga siindu tawe.

¹⁴Ndi nga omundu okhaulilanga tawe, okhali nga ekaana likhuwa tawe.

¹⁵Ee Wele Omunyali Owa Bioosi, ne kakhali ese khweyikina ewe, mala ee Omwami Wele wase, ewe olanjeeta ese.

¹⁶Okhalekha basiku base bekhoya khulwe butinyu bwase tawe, okhabalekha beniinia khulwe khukhilwa khwase tawe.

¹⁷Sikila ndi siimbi khufwa ne buchuuni bwase se buwechanga tawe.

¹⁸Niyama bubwoni bwase, nebiiya sikila bubwoni bwase.

¹⁹Basiku base balamu lundi bali ne kamaani, bakali bambiila busa khaba siene tawe.

²⁰Abo babakholelanga kamabi ne mbakholeele kamalayi, bambiila sikila ese kholanga kamalayi.

²¹Ee Wele Omunyali Owa Bioosi, okhanjanjukha tawe! Ee Wele wase, okhaba sinao tawe!

²²Ee Omwami, omuonia wase, yiicha khangu unjeete!