Read lubukusu Chiny. 39 Bible Online

Chiny. 39 - lubukusu bible

Chiny. 39

¹Lulwimbo lwa Daudi Naloma ndi, “Ndiba omurekeerefu mu bikholwa biase, ne se ndilekha chilomo chase chindeerere bubwoni tawe. Se ndilomalomela niio babooni bali tawe.”

²Nasila busa, se nang'amulakho likhuwa tawe, akhaba khu siindu siosi siosi silayi tawe! Ne kakhali bulwaale bwase bwatasa busa.

³Mala naaba ne liayaaya likali. Nga nakanakana lukali, nga neendekhelela lukali, khukhwola nasaba ndi,

⁴“Wele Omunyali Owa Bioosi, ndimenya khu siise sileeyi siriena? Ndifwa liina? Mboolele siise sitiiti siina nisio bulamu bwase bukhawelekho?”

⁵Lola, ewe wakholile bulamu bwase bwabeele butiiti, ne limenya liase se lili siindu ebweeni wowo tawe. Ng'ali omundu ali nga kumuuya busa!

⁶Ng'ali omundu amenya busa nga sisiiniini! Ng'ali nibio akhola bili bia busa, omundu abunga, ne se amanyile olibibukula tawe.

⁷Nono Wele Omunyali Owa Bioosi, ese neyikina siina? Lilieyikina liase lili khwiwe.

⁸Sikule khukhwama mu bwoni bwase bwoosi. Ne okhalekha basilu banjekheelela tawe!

⁹Ndi nga omumiinyi, se ng'amulakho tawe, sikila niwe okholile kano.

¹⁰Okhachiililila khukhumbukuuma tawe! Naweele kamaani khulwe bukhupe bwowo.

¹¹Oukuuma omwoni mu khumurafwira, nga kupurupuru ewe wonakaka nisio asiima. Ng'ali omundu ali nga kumuuya busa.

¹²Wele Omunyali Owa Bioosi, ulila lisaba liase, mala orekeeresie lilila liase, ne ndila unjeete. Ndi omukeni wowo khu siise sitiiti nga bakuuka base boosi.

¹³Ndekhe busa sangaale ne khaafwa ne khutambao tawe.