Read lubukusu Chiny. 40 Bible Online

Chiny. 40 - lubukusu bible

Chiny. 40

¹Lulwimbo lwa Daudi Naliindilila Wele Omunyali Owa Bioosi ne liliekhaliilikha, andekeeresia mala aulila lilila liase.

²Wele Omunyali Owa Bioosi andusia mwiloo lie libuna, khukhwama mu lutoondoyi lwe kamatosi. Aanda khu lwanda abuundu we kumuleembe, ne se andekha neendekhelela tawe.

³Anjeyikia lulwimbo lukeni, lulwimbo lwe khufumia Wele wefwe. Bakali balibona mala barie, ne khura lilieyikina liabwe mu Wele Omunyali Owa Bioosi.

⁴Omundu obukula Wele Omunyali Owa Bioosi aba lilieyikina liewe, okhaambaana nende be sileka namwe abo basaaya bifwaani tawe, abiitwa chikhabi.

⁵Ee Wele Omunyali Owa Bioosi, Wele wefwe, ewe wakhukholeele efwe kamakali, se aliio oli nga ewe tawe! Ewe wakhurekekheele efwe kamakhuwa kamalayi ke khuukia, se nyala nakaloma koosi tawe, se kabalikha tawe!

⁶ Ewe se wenya chimbosio ne biianwa tawe, ewe se wareebire biianwa bie khukhwosia namwe bie khurusiao bubwoni tawe. Ne kakhali ewe wandekereesie.

⁷Khwako naloma ndi, “Ese ndiio, kameyikia kowo khwise kali mu sitabu sie Lilaka.[21]

⁸Ee Wele wase, siimanga khukhola lilienya liowo, lilaka liowo lili mu mwoyo kwase.”

⁹Wele Omunyali Owa Bioosi, naboola likhuwa lilayi lie buonia bwowo khwifwe mu mukhuung'ano kwe babaandu bowo boosi, omanyile oli se ndilekha khuboola tawe.

¹⁰Se nakisile mu mwoyo kwase buyeeti bwe buonia bwowo tawe, nalomile khu busuubilifu ne buonia bwowo, se nakisile busiime bwowo bukhawa tawe ne busuubilifu bwowo khukhwama khu mukhung'aano kumuboofu tawe.

¹¹Ee Wele Omunyali Owa Bioosi, okhalekha khu khukholela ese siisa tawe, lekha busiime bwowo bukhawa tawe ne busuubilifu bwowo biniinde buli lwoosi.

¹²Sikila butinyu bukali butuuma sikelo bwangarire, bubwoni bwase bwafuumile ese, ne se nyala nabona tawe. Bubwoni bwase bukali khukhila lichuune, kumwoyo kwase se kulimo lilieyikina tawe.

¹³Ee Wele Omunyali Owa Bioosi, sangaalila khu khuusikula! Ee Wele Omunyali Owa Bioosi, khola khangu khu khunjeeta!

¹⁴Lekha abo babeenya khunjira baambwe chisoni ne khukoyaana. Lekha abo babekoomba khu khunaania batimanisibwe ne khufwolobisibwa!

¹⁵Lekha abo babanjekheelela ese baambwe chisoni khulwe khuulwa khwabwe.

¹⁶Ne kakhali lekha abo boosi bakhwenya ewe, basangaale ne khukhwekhoyela mwiwe. Lekha abo babasiima buonia bwowo balome buli lwoosi bali, “Wele Omunyali Owa Bioosi Omukali!”

¹⁷Ne samwene ndi omutaambi lundi omubanani, ne kakhali Omwami aakhebulilanga ese. Ee Wele wase, ewe niwe buyeeti, ne buonia bwase, okhakhiinda tawe!