Read lubukusu Chiny. 41 Bible Online

Chiny. 41 - lubukusu bible

Chiny. 41

¹Lulwimbo lwa Daudi Abiitwa chikhabi oyo oyeeta bataambi! Wele Omunyali Owa Bioosi alimusikula mu biise bie butinyu,

²Wele Omunyali Owa Bioosi alimuliinda ne khumutasa bulamu, alaangwa khuba owabiitwa chikhabi mu sibala, ewe Wele Omunyali Owa Bioosi se omulekha mu bunyali bwe basiku bewe tawe.

³Wele Omunyali Owa Bioosi amuyeeta ne ali omulwale, ne achuunwa Wele Omunyali Owa Bioosi ewe omuonia bulwaale bwewe bwoosi.

⁴Samwene naloma ndi, “Ee Wele Omunyali Owa Bioosi, sikila ese nakhukholeele bubwoni, kholele siisa umbonie”

⁵Basiku base bareeba mu khunjenyela kamabi bali, “Akhafwe ndaalo siina mala ebililwe?”

⁶Abo babeecha khu khumbona berusiamo busa, bangalisia chilomo chimbi khwise, mala bayiiya ne khuchilomela buli abuundu.

⁷Babambiila boosi bali mu bimoonyo khwise, bebaasia kamabi lukali khwise.

⁸Baloma bali, “Alikho alwala lukali, se alinyokha khu sisieelo siewe lundi tawe.”

⁹ Akhaba omusaale wase okhila boosi niye neyikina lukali, oyo olichanga nase, angalukhaanekho.

¹⁰Wele Omunyali Owa Bioosi, kholele siisa mala umbonie, ne ese ndieyacha khu basiku base.

¹¹Khwako omusiku wase se alambula tawe, nio manye ndi nakhusiimiisie ewe.

¹²Ne kakhali ewe wanindile sikila kholanga kamalayi, mala wandeere niio ewe oli buli lwoosi.

¹³ Khukhwama mindali khukhwola mindali, Wele Omunyali Owa Bioosi, Wele owa Isiraeli afume! Amina Amina!