Read lubukusu Chiny. 42 Bible Online

Chiny. 42 - lubukusu bible

Chiny. 42

¹Lulwimbo lwe babaana ba Kora Ee Wele, ese khwikoomba ewe nga ekhisi ne yikoomba kameechi.

²Wele omenyile mindali, ese ndi ne bulesia bwe khuuba niio oli. Ndiicha ndaalo sina niio oli mala khusaaye?

³Ndila siilo ne kumuusi, kamasika niko siakhulia siase siong'ene, basiku base bachiililila khu khundeeba bali, “Wele wowo ali waena?”

⁴Kumwoyo kwase kuli kumusiro, ne khebulila kakabira, nga ne nachichanga munju eya Wele alala ne babaandu, nga nabarangiriranga, sipupu sie babaandu basangaafu, babeemba ne khukalakasia mu khufumia Wele.

⁵Siina sikila ne sulunye? Siina sikila ne khupwa siibi sino? Ndara lilieyikina liase mu Wele, ne khumufumia lundi, oli omuonia wase lundi Wele wase.

⁶Mu mbaambe muno ndi ne bubeeleli bukali, ne khwako ndamweyikina. Andereere bibuli bie bubeeleli bukali mu mwoyo kwase, butinyu bumbatakho nga luluuchi lulwichuule, nga kimikhula kiioloola ne kiikha mu luuchi lwa Yoritani, khukhwama mu sikulu sia Herimoni ne Misiri.

⁸Lekha Wele Omunyali Owa Bioosi aasiime kumuusi ne busiime bwewe bukhawa tawe, nio siilo ese mwimbile niye lulwimbo, lisaba khu Wele oumbelesianga bulamu.

⁹Nareeba Wele lulwanda lwe buliindi bwase ndi, “Siina sikila ne unjibiliile? Siina sikila ese ne njiililila khukhupisibwa siibi, ne burafu bwe basiku base?”

¹⁰Bukhomo bwabwe bwamalile, nga bachiililila khu khundeeba bali, “Wele wowo ali waena?”

¹¹Siina sikila ne suluunye? Siina sikila ne khupwa siibi sino? Ndara lilieyikina liase mu Wele, ne khumufumia lundi, oli Omuonia wase lundi Wele wase.